Асқар Мамин бірқатар министрлікке ормандарды қалпына келтіру жөнінде тапсырма берді

Үкімет отырысында ҚР Премьер-Министрі Асқар Мамин Экология және табиғи ресурстар министрлігі қабылдап жатқан шараларды қолдайтындарын айтты, деп хабарлайды Almaty.tv тілшісі ҚазАқпаратқа сілтеме жасап.

«Биылдың өзінде тиісті мемлекеттік органдар мен әкімдіктер орманды қалпына келтіру және ағаш өсіру көлемін ұлғайтуға бағытталған дайындық жұмыстарын жүргізіп жатыр. Жоспарланған іс-шаралардың келесі жылы уақтылы іске асырылуын қамтамасыз ету қажет. Жалпы Экология және табиғи ресурстар министрлігі қабылдап жатқан шараларды қолдаймыз»,– дейді ҚР Премьер-Министрі Асқар Мамин. 

Ол Үкімет отырысына қатысқандарға бірқатар тапсырма берді. 

«Бірінші, алға қойылған міндеттерді іске асыру орман питомниктерінің аумағын ұлғайту мен өсірілген отырғызу материалының көлемін ұлғайту, арнайы техниканы сатып алу және қаржылай қамтамасыз ету жөніндегі іс-шараларды ұйымдастыруды талап етеді. Осыған байланысты Экология, Ауыл шаруашылығы, Индустрия, Қаржы министрліктеріне өңірлердің әкімдіктерімен бірге екі ай мерзімде Ормандарды қалпына келтірудің және ағаш өсірудің кешенді жоспарын әзірлеуді тапсырамын. Екінші, орман қорын ұлғайту және елді мекендерде ағаш отырғызу оларды сақтап қалуға тұрғындар мен атқарушы органдардың жауапкершілікпен қарауын талап етеді. Бұл жасыл көшеттердің жай-күйі мен пайдаланылуын мониторингтеу және түгендеу жөнінде шаралар қабылдауы қажет. Үшінші, ағаштарды заңсыз кескені үшін жазалауды қатаңдату бөлігінде заңнаманы жетілдіру жөніндегі шаралар алдағы уақытта тұрғындардың оларды қатаң сақтауын және осы мәселені мемлекеттік органдардың үйлестіруін талап етеді»,– дейді ол. 

Ол өңірлердің әкімдіктеріне Экология, Индустрия министрліктерімен бірге қабылданатын заңнамалық түзетулер мен заңға тәуелді актілердің уақтылы әрі сапалы іске асырылуын қамтамасыз етуді тапсырды. 

Сонымен қатар, өңірлердің әкімдіктері тиісті орман қорғау қызметтерінің материалдық-техникалық және кадрлық қамтамасыз ету шараларын қабылдауы қажет екенін айтты.