Экология министрі киіктердің популяциясын зерттеуге қаржы бөлуді сұрады

Үкімет отырысында ҚР Экология, геология және табиғи ресрурстар министрі Серікқали Брекшев киік популяциясын тыңғылықты зерттеуге қаржы сұрады, деп хабарлайды Almaty.tv тілшісі ҚазАқпаратқа сілтеме жасап.

«Киік популяциясын реттеу туралы айтсақ, кеше біз ғылым мен салалық қауымдастықтардың қатысуымен жиналыс өткізіп, ортақ шешімге келдік. Бірінші. Терең мониторинг жүргізіп, киік полпуляциясын тиімді реттеу үшін күрделі ғылыми зерттеулер жүргізу қажет. Биыл Зоология институты Ғылым және жоғары білім министрлігіне осы тақырып бойынша зерттеулер жүргізу үшін өтінім берген еді. Өкінішке қарай, бұл жоба қабылданбады. Осыған байланысты, Әлихан Асханұлы, Ғылым және жоғары білім, Қаржы министрліктері осы зерттеулерді қаржыландыруды биылдан бастап қарастыруын сұраймыз», - деді Серікқали Брекешев. 

Сондай-ақ, министр киіктен зардап шеккен шаруалардың мәселесін де көтерді.

«Аталмыш зерттеулер жүргізіліп, оның қорытындысы шыққанға дейін шаруаларға келген залалды есептеу әдістемесі әзірленіп, өтемақы төлеу мәселесі пысықталады», - деді ол. 

Кеше Президент аталған ведомствоның жұмысына бірнеше сын айтып, Серікқали Брекешевке сөгіс жариялаған еді.