Түркістан облысының Жетісай ауданында жеке кәсіпкер аз қамтамасыз етілген және көпбалалы отбасыларға 200 қап ұн таратып берді. Іскер азамат еліміздегі төтенше жағдайға байланысты жарияланған BizBirgemiz акциясына үлесін қосты, деп хабарлайды ҚазАқпарат.
Қазыбек би ауылдық округіне қарасты Ә.Оспанов ауылының тумасы карантин мезгілінде қиындыққа тап болған жерлестеріне осылайша қолдау білдіруді жөн санаған. Ол өз есебінен таратылған ұндарды Жетісай қаласы мен Қазыбек би ауылындағы әлеуметтік жағдайы төмен отбасыларға үлестіріп берді.
«Осындай қиын-қыстау кезеңде жерлестеріме көмек беруді азаматтық парызым деп есептеймін. Ең бастысы - еліміз аман-есен осы қиындықты еңсерсе екен деген ниетім бар»,- дейді жомарт азамат.
Айта кетейік, Жетісай ауданында коронавирус жұқтырған науқастар саны 20 адамға жеткен. Олардың тұрғылықты жерлері оқшауланып, карантинге жабылған. Осы жағдайды ескерген жергілікті кәсіпкерлер ондағы тұрғындарға қолдан келгенше көмек көрсетіп жатыр. Күні бүгінге дейін демушілер есебінен аз қамтылған отбасыларға 10 миллионнан астам қаржының азық-түлігі жеткізілді.
