Түркияда маска тақпай жүруге рұқсат берілді

Түркия маска тағуға қатысты шектеуді алып тастады. Енді елде желдету жеткілікті болса және әлеуметтік қашықтықты сақтау мүмкіндігі болса, маска түріндегі қорғаныс құралдарын пайдалану қажет емес, деп хабарлайды Almaty.tv тілшісі ҚазАқпаратқа сілтеме жасап.

Түркияның Денсаулық сақтау министрі Фахреттин Кожа коронавирустың таралуымен күрес жөніндегі ғылыми кеңес отырысының қорытындысы бойынша өткен брифингте елде ашық ауада және жақсы желдетілетін жерлерде маска киюді міндеттеу алынатынын айтты.

«Бізге енді көшеде маска тағудың қажеті жоқ. Бірақ бұл медициналық атрибут күнделікті өмірімізден кетпейді. Тиісті қашықтық сақталмаған жабық ғимараттарда әлі де қорғаныс құралдарын пайдалануымыз керек. Тар кеңістік, ұшақ пен көлік кабиналары, көрермен залдары, медицина мекемелері мен оқу орындарында әлі де маска тағуға тура келеді. Сонымен қатар, қарт адамдар мен созылмалы ауруға шалдыққан адамдарға қорғануға кеңес беріледі», - деді министр.

Сонымен қатар, елде COVID-ке қарсы ережелердің басқа да жеңілдетулері бекітілді. Енді ел мектептерінде сыныптарда вирус жұқтырған оқушыдан кем болса, сынып карантинге жабылмайды, ал қалған балалар оқуын оқшауланбай жалғастыра алады. Адамдарда коронавирус белгілері болмаса, олардан ПТР тестілері алынбайды. COVID-19 жұқтырғандармен байланыста болған және ауру белгілері жоқ адамдар енді қоғамнан оқшауланбайды. Сонымен қатар, Түркияда келесі аптадан бастап барлық медициналық мекемелерде отандық TURKOVAC вакцинасы егіледі. Министрдің айтуынша, Түркия эпидемиялық процестің бастапқы кезеңінде барлық қажетті шараларды қабылдаған және соның нәтижесінде пандемия құрбандарының барынша аз болуын қамтамасыз еткен алғашқы елдердің бірі болды. Түркия Денсаулық сақтау министрлігінің мәліметінше, өткен тәулікте елде COVID-19-ға 407 536 сынақ жүргізілді, оның ішінде 56 780 адамнан вирус анықталды, 189 адам қайтыс болды, дерттен 68 268 адам жазылды. Елде адамдарға салынған вакцинаның жалпы саны 145 801 884 дозаға дейін өсті.