|
24.03.2020 | 12:32
1709

Алматыда алыпсатарлардан тәркіленген 3 млн маска қалалық қызметтер жұмысына берілді

Рейдтік іс-шаралар кезінде 16 тонна спирт те тәркіленді

Алматыда алыпсатарлардан тәркіленген 3 млн маска қалалық қызметтер жұмысына берілді Фото: ашық дереккөзден

Алматыда қалалық қызметтердің профилактикалық жұмысына 3 млн маска бөлінді, деп хабарлайды Almaty.tv тілшісі қалалық әкімдіктің баспасөз қызметіне сілтеме жасап.

Бұған дейін хабарланғандай, Алматыда медициналық бетперделер мен антисептикалық құралдардың алаяқтық жолмен саудаға түсуін, сондай-ақ сату кезінде бағаны негізсіз көтеру фактілерін анықтау үшін рейдтік іс-шаралар жүргізілуде. Нәтижесінде, Алматыда кәсіпкерлік қызметті жүзеге асыруы үшін тиісті құжаты жоқ азаматтар медициналық бетперделерді үстеме бағамен сатқан кезде қолға түсті.

Қазақстан Республикасы Президентінің жанындағы Төтенше жағдай режимін қамтамасыз ету жөніндегі мемлекеттік комиссияның хаттамасы негізінде тәркіленген медициналық бетперделердің барлығы дереу қалалық Қоғамдық денсаулық басқармасына берілді.


«Тәркіленген 3 млн маска күшейтілген режимде санитарлық-эпидемиологиялық шараларды жүзеге асырып жатқан қаладағы барлық медициналық ұйымдарға бөлініп беріледі.  2 миллионнан астам медициналық маскалар қалалық Қоғамдық денсаулық басқармасының медициналық қызметкерлеріне берілді. Бүгінде олар провизорлық стационарлар мен изоляторларда, сондай-ақ үй стационарындағы адамдарға медициналық бақылау жүргізуде. Қалған жеке қорғану құралдары эпидемиологтарға, Тауарлар мен қызметтердің сапасы мен қауіпсіздігін бақылау, Ішкі істер, ТЖ, Ұлттық гвардия және т.б. департаменттердің қызметкерлеріне үлестірілді», – делінген баспасөз хабарламасында. 

Сонымен қатар, маскалар Open Almaty қоғамдық қабылдау бөлмесінің қызметкерлеріне де таратылды. Өйткені, олар тәулік бойы 1308 нөмірі бойынша тұрғындарға барлық мәселелер жөнінде, соның ішінде коронавирустық инфекцияның таралуына қарсы әрекет бойынша кеңес беруде.


Рейдтік іс-шаралар кезінде 16 тонна спирт те тәркіленді. Стерильдеу кезінде дезинфекциялау құралы ретінде пайдалануға жарамды бұл спирт медициналық ұйымдарға бөлінді.

Жалпы қала әкімдігі коронавирустық инфекцияның таралуына жол бермеу үшін барлық тиісті жұмыстарды жалғастыруда. Карантинді енгізу туралы шешімнен кейін 27 блок-бекетте күш құрылымдары мен медициналық ұйым қызметкерлерінің жұмысы жанданды. Қалада COVID-2019 ошағы анықталды. Ол аймақта дезинфекциялық іс-шаралар жүргізілуде. Мақсат – коронавирус індетінің таралу тізбегін жою. Өз кезегінде қала билігі қала тұрғындарын карантин режимін қатаң сақтауға және әркімді мүмкіндігінше оқшаулануына шақырды.

Сұрақтар бойынша 1406 және Open Almaty 1308 нөмірлері бойынша тәулік бойы жұмыс істейтін call-орталыққа хабарласыңыз. Катаралды белгілері бар адамдар анықталған жағдайда дереу қаланың санитарлық-эпидемиологиялық қызметінің тәулік бойы жұмыс істейтін 382-33-50 нөміріне хабарлау керек.

Ресми ақпарат Алматы қаласы әкімдігінің сайтында және әлеуметтік желілердегі ресми парақшаларында қолжетімді. Қосымша ақпарат жедел түрде Telegram арнасындағы stopcov Almaty және Darmen мобильді қосымшасына салынады.


Біздің Telegram каналына жазылып, соңғы ақпаратты оқыңыз. Егер хабарлама жолдағыңыз келсе, WhatsApp мессенжеріне жазыңыз.
Новости партнеров

Janalyqtar tizbegi

След. →
Прямой эфир