Ashyq жобасы арқылы коронавирус жұқтырған 3,5 мың адам анықталды

Ashyq жобасы арқылы коронавирус жұқтырған 3,5 мың адам анықталды. Бұл туралы бүгін Үкімет отырысында Денсаулық сақтау министрі Алексей Цой мәлімдеді. Айтуынша, жобаға қатысушылардың саны 8 мыңнан асып түскен. Екі аптаның ішінде қолданушылардың саны 1,4 млн адамнан 2 млн адамға дейін жетіпті, деп хабарлайды Almaty.tv.

«Аталған жоба енгізілген сәттен бері ПТР-дың оң нәтижесі бар 3 556 науқас және байланыста болған 3 012 адам анықталды. Бұл статистика, өкінішке қарай, кейбір азаматтардың үйде оқшаулану режимін сақтамайтынын, тұрғындар көп жиналатын нысандарға баруға тырысатынын, ел ішінде жүріп-тұратынын, сол арқылы төңірегіндегілерге жұқтыру қаупін төндіретінін көрсетеді», – деді ҚР Денсаулық сақтау министрі Алексей Цой .

Бұдан бөлек, Ashyq жобасы көшбасшысы мәртебесін алған қатысушылар жұмыс уақыты мен шарттары бойынша қосымша жеңілдіктер алады. Атап айтқанда, жоба көшбасшылары қызмет түріне байланысты 2 аптаның ішінде нысандағы тіркеу саны бойынша анықталады. Сонымен қатар, Ashyq жобасына туристік сала нысандарын, білім орталықтарын, балаларды сауықтыру ұйымдарын қосу мәселесі пысықталып жатыр. Бұл ретте Премьер-министр Асқар Мамин вакциналау паспортын қосымшаға енгізуді тапсырды. Себебі «қызыл» аймақтардың қысқаруына вакцина алғандар санының артуы оң әсер етіп отыр.

«Бүгінде  вакцинаның бірінші компоненті 2,1 млн астам адамға, екінші компонент 1 млн астам адамға егілді. Маусым айында вакцина қорын 2 млн бірінші және 2 млн екінші компонентпен толықтыру бойынша шаралар қабылданып жатыр. Денсаулық сақтау министрі мен әкімдер маусым айында вакциналау қарқынын елеулі түрде арттыру керек.  Вакциналау паспортын Ashyq қосымшасына енгізу керек», – деді ҚР Премьер-министрі Асқар Мамин.