Қазақстанда вакциналаудың электрондық паспорты әзірленді

Елімізде жүйелі есепке алу мақсатында вакциналаудың электрондық паспорты әзірленді, деп хабарлайды Almaty.tv тілшісі.

Деректер денсаулық сақтау министрлігінің орталықтандырылған ақпараттық жүйесінде жүргізілетін болады. Ал, ведомство басшысы Алексей Цой тұрғындардың санитарлық талаптарды сақтамауы вирустың қарқынды таралуына жол беруде дейді. Мәселен, жыл басынан бері 14 мың 625 адам дертке шалдыққан. Қазіргі таңда Шығыс Қазақстан облысынан басқа барлық аймақтарда науқастар саны өсе бастаған. 

Үкімет отырысы жаңа тағайындалған Ұлттық экономика министрі мен Еңбек және халықты әлеуметтік қорғау министрінің ант беруімен басталды. Рәсімнен кейін қайта жасақталған Үкімет құрамы бірден әлемді әбігерге салған коронавирус инфекциясының алдын алу жұмыстарын талқылады. Бүгінгі күні Қазақстанда 6 өңір «қызыл аймақта». Бұл Атырау, Ақмола, Павлодар, Қостанай, Солтүстік Қазақстан облысы және Нұр-Сұлтан қаласы. Батыс Қазақстан, Алматы мен Қарағанды облысы сары аумақта тұр.

«Дерттің шарықтау ықтимал шыңы осы жылдың наурыз айының соңында мүмкін болады. Оптимистік сценарий бойынша тәулігіне 3 мың жағдайға дейін тіркелу күтілуде, ал төсек қорының барынша қамтылуы 24 мың төсекке дейін жетуі мүмкін. Дегенмен, осы сценарий бойынша қатаң карантиндік шараларды енгізу жоспарланбаған. Шынайы және пессимистік сценарийлер кезінде күнделікті тіркеу тиісінше 6 және 9 мың жағдайға дейін жетуі мүмкін», – деді ҚР Денсаулық сақтау министрі Алексей Цой.

Ал, коронавирусқа қарсы вакцинаны 1 ақпаннан бастап тұрғындарға егу жоспарлануда. Министрдің айтуынша, халыққа екпе жұмыстары вакцинаның жеткізілу мөлшеріне қарай салынады. Және алдымен қауіпті дертпен бетпе-бет келетін медицина қызметкерлеріне, сондай-ақ ауруды жұқтыру қаупі жоғары азаматтарға жасалады. Мамандардың айтуы бойынша, вакцинация инфекциядан тиімді қорғайды. Сонымен қатар жаппай иммундау нәтижесінде халықтың жұқтыру және сырқаттану қаупін төмендетеді.

«Контингент келесі тәртіпте белгіленген: бірінші кезеңде инфекциялық ауруханалардың медицина қызметкерлеріне, жедел жәрдем қызметінің мамандарына, жан сақтау бөлімінің, алғашқы медициналық-санитарлық көмек қызметінің, ауруханалардың қабылдау бөлімінің, санитарлық-эпидемиологиялық қызметтің мамандарына, нақтырақ айтқанда 100 мыңға тарта азаматқа вакцина салынады», – деді ҚР Денсаулық сақтау министрі Алексей Цой.

Ал, екінші және үшінші кезеңдерде жалпы білім беретін мектептердің мұғалімдеріне, ЖОО оқытушыларына, балалар мен мектепке дейінгі мекемелердің қызметкерлеріне, студенттерге, созылмалы аурулары бар азаматтарға вакцинациялау жүргізілмек. Осылайша жыл соңына дейін 6 миллион қазақстандық екпе жасайды деп жоспарланған. Денсаулық сақтау министрлігінің есептеуінше, 2 миллион адамды вакцинациялау тіркелген жағдайдың санын 40 мыңға азайтады. Тиісінше, вакцинациямен қамту неғұрлым көп болса, КВИ ауруы мен өлім азаяды және шектеу шаралары мен локдаунсыз өмірге оралу ықтималдығы жоғары.

«Қазіргі таңда халыққа жаппай вакцина салуды ұйымдастыру ең маңызды міндет болып табылады. Өздеріңізге мәлім, отандық вакцина клиникалық сынақтардың III кезеңінен өткізіліп жатыр, және де «Спутник V» вакцинасының сапасы аттестациялануда. GMP стандарты бойынша вакциналар шығаратын биофармзауыт құрылысы жүргізіліп жатыр», – деді ҚР Премьер-Министрі Асқар Мамин.

Ал, Ішкі істер министрінің айтуынша, жыл басынан бері карантинді бұзудың 773 фактісі анықталған. Әсіресе Түркістан облысында талапқа бағынбау көп тіркелуде. Сонымен қатар, "қызыл" аймақта орналасқан аймақта мобильдік топтардың жұмысына нашар деген баға берілді.

Асылбек Тойбек «Алматы» телеарнасы