Қазақстанда заңсыз жүрген 121 шетелдік азамат елден шығарылды

Қазақстанда заңсыз жүрген 121 шетелдік азамат елден шығарылды, деп хабарлайды Almaty.tv тілшісі ІІМ баспасөз қызметіне сілтеме жасап.

Республика аумағында «Мигрант» жедел-профилактикалық іс-шарасы өткізілді. Бес күнде көші-қон заңнамасын бұзудың 10 мыңнан астам дерегі анықталды.

• елде болу ережелерін бұзғаны үшін 4475 шетелдік;
• заңсыз жұмыс істегені үшін 2118 шетелдік;
• 613 жұмыс беруші шетелдік жұмыс күшін заңсыз пайдаланғаны үшін;
• 2624 жеке және заңды тұлға өздерімен бірге жүрген шетелдіктер туралы полицияға дер кезінде хабар бермегені үшін жауапкершілікке тартылды.

«Сонымен қатар қос азаматтықтың 9 фактісі анықталды, шетелдіктерге елде тұруға берілген 113 ықтиярхат күшін жойды.

Көші-қон заңнамасын бұзғандарды елден шығару туралы 850 сот шешімі шығарылды. 121 шетелдік елден мәжбүрлеп шығарылды. Депортацияланғандарға бес жылға Қазақстанға кіруге тыйым салынады. Іздеуде жүрген 37 шетелдік ұсталды», - деп жазылған хабарламада.

Көші-қон қызметі елге шетелдіктерді шақыратын қазақстандықтарға шақырылған шетелдік азаматтардың елден уақытылы кетуін ұйымдастыру қажеттігін еске салады.

Оқи отырыңыз: Алматыда мектептер жанынан қосалқы нысанның құрылысы жүріп жатыр