Әзербайжанда Қазақстанның мәдениет күндері өтті

Бакуде Қазақстанның Әзербайжандағы мәдениет күндері өтті, деп хабарлайды Аlmaty.tv тілшісі inform.kz-ке сілтеме жасап.

Қазақ-әзербайжан қарым-қатынасын нығайту мақсатында өзара мәдени күндерді өткізу туралы тапсырманы Мемлекет басшылары Қасым-Жомарт Тоқаев пен Ильхам Әлиев берген болатын.

Іс-шараға Қазақстан Республикасының Мәдениет және ақпарат министрі Аида Балаева мен Қазақстанның Әзербайжандағы елшісі Әлім Байел қатысты. Мәдениет күндері аясында «Хассақ» этно-фольклорлық тобының жеке концерті мен Ғ. Мүсірепов атындағы Қазақ мемлекеттік академиялық театры қойған «Қаракөз» спектаклінің көрсетілімі ұйымдастырылды.

Қорытынды мәдени шара 2023 жылдың 4 желтоқсанында Гейдар Әлиев орталығында өтті. Мұнда Қазақстанның бейнелеу өнерінің көрмесі ашылды, онда әртүрлі жанрлар мен стильде жұмыс істейтін қазақстандық жас суретшілер 46 бірегей жұмысы экспозициясын ұсынды.

Министр А.Балаева көрменің екі халықтың мәдени жаңғыруының көрінісі екенін айтты. Көрмеде кескіндеме, графика, кестелеу, сәндік-қолданбалы өнер сияқты бейнелеу өнерінің дәстүрлі түрлерімен қатар жаңа түрлері – инсталляциялар мен арт-нысандар қойылды.

Туындыларын көрмеге қойған суретшілердің қатарында Әсел Сабыржанқызы да болды. Жас суретші ерекше кілемге сурет салу техникасын қолданады. Соның ішінде түркі тарихынан 14 әйел бейнесін жасаған. Ол Әзербайжан кілем мұражайын аралап, көргенінен шабыттанып, көрнекті ақын Хуршидбану Натаванның портретін салды. Портрет Әзербайжан Мәжілісінің төрайымына табыс етілді.

Мәдениет күндері Қазақстан өнер шеберлерінің салтанатты гала-концертімен аяқталды. Іс-шараға Әзербайжан Парламентінің төрайымы Сахиба Гафарова, министрлер, Кавказ мұсылмандары басқармасының төрағасы, депутаттар, шет мемлекеттердің елшілері, халықаралық ұйымдардың басшылары, көрнекті мәдениет, ғылым және өнер қайраткерлері қатысты.

Құттықтау сөзінде ҚР Мәдениет және ақпарат министрі Әзербайжанның Қазақстан үшін тату көрші, адал дос және бауырлас ел екенін айтып, түркі әлемін бірге дамытып келе жатқанымызға назар аударды. Аида Балаева Әзербайжанның мәдениет министрі Әділ Керимлиге және Қазақстанның Әзербайжандағы елшісі Әлім Байелге, сондай-ақ олардың ұжымдарына Мәдениет күндерін жоғары деңгейде өткізуге жан-жақты қолдау көрсеткендері үшін шынайы алғысын білдірді.

Гала-концертте Қазақстанның халық әртісі Роза Рымбаева, «Құрмет» орденінің иегері Зарина Алтынбаева, Қазақстанның еңбек сіңірген қайраткерлері Әлішер Каримов, Медет Чотабаев, Әйгерім Бекетаева, «Салтанат» мемлекеттік би ансамблі, «IL Canto», «Виола», «T&Y» ұйымдары Фикрет Әміров атындағы Әзербайжан мемлекеттік ән-би ансамблі, «Ұлытау» тобы және «Сазген сазы» ансамблі өнер көрсетті. Әзербайжан жұртшылығы концертке тәнті болды.

Мәдениет күндері аясында ресми кездесулер де өтті. Әзербайжан Президентінің көмекшісі Хикмет Гаджиевпен кездесуде мәдениет және ақпарат саласындағы екіжақты ынтымақтастықтың келешегі талқыланды.

 - Әзербайжан үшін Қазақстанмен стратегиялық қарым-қатынастар басымдыққа ие. Бізді Қазақстанның кинематографиялық тәжірибесі ерекше қызықтырады. Сіздерде анимация жақсы дамыған, - деді Х. Гаджиев кездесу барысында. 

А. Балаева бұл бағытта қолдау көрсетуге уәде берді. Шәкен Айманов атындағы «Қазақфильм» Ұлттық киностудиясының мұрағаты, анимациялық фильмдер мен «Балапан» балалар арнасының контенті Әзербайжанға берілетін болады.

Министр сондай-ақ Х. Гаджиевтің жалған ақпаратпен күресу бойынша халықаралық медиа-форум өткізу туралы бастамасын қолдады.

Оқи отырыңыз: Тәуелсіздік күні қарсаңында алматылық қариялар бақ сынасты