Маймыл шешегіне қарсы жаппай екпе салу қажет емес - ДДСҰ

Дүниежүзілік денсаулық сақтау ұйымы елдерге маймыл шешегіне қарсы жаппай вакцинациялауды ұсынбайды, деді ұйымның бас директоры Тедрос Адханом Гебрейюс.

78 елде маймыл шешегін жұқтырудың 18 мыңнан астам жағдайы анықталды, олардың 70% – Еуропада, деп хабарлайды Almaty.tv тілшісі.

"ДДСҰ вакцинацияны маймыл шешегіне шалдыққандарға, сондай-ақ жұқтыру қаупі жоғары адамдарға ғана екпе жасауды ұсынады. Мұндай тізімге медицина, кейбір зертхана қызметкерлері және бірнеше жыныстық серіктесі бар адамдарды енгізуге болады. Қазіргі уақытта біз маймыл шешегіне қарсы жаппай вакцинациялауды ұсынбаймыз", - деді ұйым басшысы брифингте.

Еске сала кетсек, өткен аптада ДДСҰ індетті Халықаралық денсаулық сақтау саласындағы төтенше жағдай деп таныды.

Кеше, сәрсенбіде өткен брифинг барысында денсаулық сақтау вице-министрі Айжан Есмағамбетова бүкіл халықты маймыл шешегіне қарсы жаппай вакциналаудың қажеті жоқ екенін мәлімдеді.

Есмағамбетова ДДСҰ мәліметінше Қазақстан маймыл шешегінің таралу қаупі төмен елдер қатарына жататынын айтты.