Алматы қаласында 6 000-нан астам әйел сүт безі қатерлі ісік диагнозымен есепте тұр

Ерте диагностика – қатерлі ісікпен күресудің ең тиімді әдісі. Дүниежүзілік денсаулық сақтау ұйымының мәліметі бойынша сүт безі қатерлі ісігі дүние жүзінде әйелдер өлімінің негізгі себептерінің бірі болып табылады, деп хабарлайды Almaty.tv.

1993 жылы Дүниежүзілік денсаулық сақтау ұйымы (ДДҰ) Дүниежүзілік сүт безі қатерлі ісігіне қарсы күрес күнін белгіледі, ол жыл сайын 15 қазанда өтеді.

- жыл сайын әлемде сүт безі қатерлі ісікпен 2 300 000 жайт анықталады;

- өлім-жітім – 685 000  оқиға;

- ауру қарқынды дамып келеді: көбінесе ол 40 жасқа дейінгі адамдарда кездеседі;

- әр 8 әйелдің бірі  өмірінде сүт безі қатерлі ісігіне шалдығу қаупі бар.

Алматы қаласында 6 635 әйел сүт безі қатерлі ісік диагнозымен есепте тұр.

Статистикаға сәйкес, қалада жыл сайын 700-ге жуық сүт безі қатерлі ісігімен ауыратын әйелдер анықталады, яғни, бұл патологиямен қалада күнделікті 2 әйел ауырады.

2021 жылы Алматы қаласында сүт безі қатерлі ісігінен 192 әйел қайтыс болды, оның 50 %-ы еңбекке қабілетті жастағылар.

Сүт безі қатерлі ісігінің қауіп факторлары: тұқым қуалаушылық (анасында, апаларында аурудың болуы), жаман әдеттер (алкогольді қабылдау, темекі шегу), гормоналды теңгерімсіздік (емшек емізуден бас тарту, эндокриндік аурулар, гормоналды контрацептивтерді бақылаусыз қолдану) және т.б.

Қатерлі ісіктерді ерте анықтауда мыналар маңызды рөл атқарады:

- сүт безін үнемі  тексеру;

- емханада маммологтың жыл сайынғы профилактикалық тексеруі;

- 40 жастан 70 жасқа дейінгі әйелдер үшін 2 жылда бір рет маммографиядан өту.

Уақытылы емдеу – сіздің сұлулығыңыз бен денсаулығыңызды ғана емес, өміріңізді де сақтаудың кілті болып табылады!

Дүниежүзілік сүт безі қатерлі ісігіне қарсы күрес күні аясында Алматы онкология орталығында 2022 жылдың 1 қазанынан бастап әр сенбі сайын (1, 8, 15, 22, 29) сүт безі қатерлі ісігін ерте анықтау бойынша Ашық есік күндері өткізіледі.

Өткізу орны мен уақыты:  Алматы онкология орталығы, Папанин к-сі, 220, литер А, 1 қабат, сағ. 09.00-ден 13.00-ге дейін.