Шымкенттік ата-аналар талма ауруына шалдыққан балаларына дәріні шетелден алдыртуға мәжбүр

Шымкентте талма ауруына шалдыққандарға берілетін дәрі-дәрмекке зәру болған ата-аналар шағым айтты. Олар бұл дертке қарсы препараттар қаланың ешбір дәріханаларында сатылмайды дейді. Сондықтан амалы таусылған аналар елімізде тіркелмеген дәрі-дәрмекті шетелден тапсырыспен алдыртуға мәжбүр, деп хабарлайды Almaty.tv тілшісі.           

Базынасын айтып, қалалық Nur Otan ғимаратының алдына келгендердің бірі – Гүлмира Мұсабаева. Қызы Мейірімнен эпилепсияның алғашқы белгілері 5 айлық шағында байқала бастапты. Сол уақыттан бері жанынан бір елі ажырамадым дейді. Тіпті күніне отыз рет талмасы ұстап, жаны қиналады екен. Үмітін үзбеген ана қыруар қаражатқа дәріні шетелден алмасқа шарасы жоқ.

«Бұл бала 5 айында инсульт алған. Инсульттан кейін талмасы басталған. Содан кейін ішпеген дәріміз қалмады. «Кармамизипл», «Канвулекс», «Ламиктал»... «Ламиктал» тегін беріледі, бірақ бізге «Фризиумды» қосып отыр. Бұл Турциядан келетін дәрі. Ай сайынғы шығыным қазір 250-300 мың теңгеге жетіп отыр. Өйткені, күніне қазір жиі ауырып қалады, талмасы ұстайды», – дейді ата-ана Гүлмира Мұсабаева.

Ата-аналардың шағымын тыңдаған қаланың бас дәрігері Бақытжан Позилов кездесуден кейін, минстрліктен тіркеуде жоқ дәрілерді тізімге алуын сұрайтынын жеткізді.

«Тіркеуден өтпеген дәрілерді науқастарға бере алмаймыз. Алайда науқастарға дәріге қатысты қазір Денсаулық сақтау министрлігіне хат жазып, тіркеуден өтуін тездетуді сұраймыз және тіркеуден өтпеген жағдайда бір реттік жеткізумен елге кіргізу бойынша жұмыстарды қолға аламыз», – деді Денсаулық сақтау басқармасының басшысы Бақытжан Позилов.

Айта кетейік, қазір Шымкентте талма ауруымен 200-ден астам бала ауырады екен. Оның басым бөлігі – бүлдіршіндер.