Қазақстанда ҰБТ басталды

21 маусымда елімізде Ұлттық бірыңғай тест (ҰБТ) тапсыру басталды, деп хабарлайды Almaty.tv.

Білім және ғылым министрлігінің мәліметінше, ҰБТ биыл 21 маусым мен 5 шілде аралығында 161 пунктінде өтеді. Аудиториядағы адам саны 2 есеге қысқарған. Барлық аудиториядан онлайн трансляция жүргізіледі.

ҰБТ-ның алғашқы күні 161 пунктің 51-і ғана жұмыс істейді. Оның 44-і ауылдық жерлерде орналасқан. Орташа есеппен бір ҰБТ тапсыру пунктіне 120 адамнан келеді. Бірінші күні  емтиханды тек 6,5 мың талапкер тапсырады. Білім және ғылым министрі Асхат Аймағамбетов ҰБТ тапсыратын түлектерге сәттілік тіледі.

Бүгін Алматы қаласында Абай атындағы Қазақ ұлттық педагогикалық университетінде  ҰБТ тапсырудың бірінші легі өтіп жатыр. Бірінші күні 235 адам тест тапсырады.

Оқушылар мен тәрбиеленушілерлің өмірі мен денсаулығын сақтау мақсатында, сонымен бірге COVID-19 коронавирус инфекциясының таралуының алдын алу үшін бекітілген алгоритмге сәйкес, ҰБТ өткізу кезінде барлық санитарлық-эпидемиологиялық талаптар сақталады.

Қалалық Білім басқармасы мен Алматы қаласының Тауарлар мен қызметтердің сапасы мен қауіпсіздігін бақылау департаментінің COVID-19 коронавирус инфекциясының таралу қаупін азайтуға байланысты бірлесіп бекіткен жоспарына сәйкес, Абай атындағы ҚазҰПУ-де тест тапсырушыларға дезинфекциядан өту үшін 5 кезеңнен  тұратын барлық жағдайлар жасалғанын хабарлады.

- Баррикадалық шектеу ленталары орнатылған және тест тапсырушылар арасында кем дегенде екі метр қашықтық  сақтау үшін сынаққа қатысушылар саны екі есе аз болмақ, ол үшін 15 аудитория әзірленген;

- Тепловизорлар;

- Бактерицидті лампалар және әрбір аудиторияға ауа рециркуляторы;

- Тест тапсырушылар үшін қарапайым маскалар;

- Дезинфекциялау тунелі;

- Жедел медицина көлігі;

- Дензинфекциялық кілемшелер;

Қолданылған маскаларды жою үшін жәшіктер;

- Санитайзерлер;

- Медпунктте маскалар мен салфеткалар қоры;

- Мемлекеттік комисиия мүшелері үшін маскалар.

Сонымен бірге, барлық аудиторияларда бейнебақылау камералары орнатылған.

Тест өткізілетін күндері ТҚСҚБД қызметкерлері ҰБТ өткізу пункттерінің санитарлық- эпидемиологиялық жағдайын бақылайтын болады.

Еске сала кетейік, Алматыда барлығы 14 972 адам тест тапсырады деп жоспарлануда, соның ішінде 9 047 -сі(97%) биылғы жылдың түлектері болса, 5 925-і өткен жылдардың және колледждердің түлектері.