Түрксіб ауданының мектептерінде орын тапшылығын азайту жұмыстары қалай жүріп жатыр

Түрксіб ауданын білім беру объектілерімен қамтамасыз ету жұмыстары белсенді жүргізіп жатыр. Бұл туралы қала әкімі Ерболат Досаев аудан халқымен кездесуінде мәлімдеді, деп хабарлайды Almaty.tv.

Әкімнің айтуынша, осы жылдың 1 қыркүйегінде аудандағы оқушы орындарының тапшылығы 2 мыңнан асты (2 119).

"Қазіргі оқу жылының басында Волочаевская көшесінде 420 орындық жеке мектеп ашылды. Ағымдағы жылдың 16 желтоқсанына дейін «Қайрат» шағынауданындағы 1500 орындық мемлекеттік мектептің құрылысы аяқталады (Kazpaco ЖШС / BI-group)", - деді Досаев.

Сонымен қатар, бүгінгі таңда аудандағы 1350 орынға 3 мектепті - № 59, № 195 және № 198 мектептерді кеңейту жұмыстары жүріп жатыр.

Биыл қазан айында №59 мектеп-гимназияның аумағында 300 орындық жаңа мектеп ғимараты мен қосымша  құрылысты салу басталады. Ал, ескі ғимараттың бір бөлігі бұзылады.

№195 және №198 мектептер бойынша 1050 орындық қосымша құрылыс салу үшін жобалау-сметалық құжаттама әзірленіп жатыр. Жобалау-сметалық құжаттаманы 2023 жылдың шілдесінде  аяқтау жоспарланған.