Сәт Тоқпақбаевқа «Халық қаһарманы» атағы берілді

Сәт Тоқпақбаевқа «Халық қаһарманы» атағы берілді, деп хабарлайды Almaty.tv тілшісі Ақордаға сілтеме жасап.

- Президент Жарлығымен Қазақстан Республикасына сіңірген ерен еңбегі үшін мемлекет қайраткері Сәт Бесімбайұлы Тоқпақбаевқа «Халық қаһарманы» атағы берілді, - делінген Ақорда хабарламасында.

Сондай-ақ айрықша ерекшелік белгісі – Алтын жұлдыз бен «Отан» ордені тапсырылды.

Сәт Бесімбайұлы Тоқпақбаев 1939 жылы 17 қыркүйекте Алматы облысы Іле ауданының ҚазЦИК ауылында дүниеге келген. 1963 жылы С.М. Киров атындағы Қазақ мемлекеттік университетінің заң факультетін заңгер мамандығы бойынша, КСРО МҚК №302 Минск мектебін, 1971 жылы КСРО СІМ Жоғары дипломатиялық мектебін тәмамдаған. Генерал-полковник.

1956 жылы – Алматы облысы Іле ауданының «Комсомол» ұжымшарында жұмысшы.

1957 жылы – Алматы облысындағы Боралдай кірпіш зауытының вагоншы-жұмыскері.

1958 жылы – С.М. Киров атындағы Қазақ мемлекеттік университетінің студенті.

1963 жылдың шілдесінен – Алматы облыстық прокуратурасының тергеушісі.

1963 жылдың қыркүйегінен – КСРО МҚК №302 Минск мектебінің курсанты; КСРО МҚК кадрлық офицері, жедел өкілден ҚазКСР МҚК Басқармасының бастығы лауазымына дейінгі қызмет жолын өткен.

1991 жылдың қарашасынан – Алматы қаласы және Алматы облысы бойынша ҚР МҚК Басқармасының бастығы.

1993 жылдың маусымынан – ҚР ҰҚК төрағасының бірінші орынбасары.

1993 жылдың желтоқсанынан – ҚР ҰҚК төрағасы.

1995 жылдың қарашасынан – ҚР Президенті Күзет қызметінің бастығы - ҚР Республикалық гвардиясының қолбасшысы міндетін атқарушы.

1997 жылдың наурызынан – ҚР Республикалық гвардиясының қолбасшысы.

1999 жылдың қазанынан – ҚР қорғаныс министрі.

2001 жылдың желтоқсанынан – ҚР Президентінің кеңесшісі - Сыбайлас жемқорлыққа қарсы күрес және ҚР мемлекеттік қызметкерлерінің қызметті жөніндегі комиссияның төрағасы - ҚР Президеті жанындағы Азаматтық мәселелері жөніндегі комиссиянын төрағасы.

2002 жылдың қыркүйек айынан - «Еуро-Азия Эйр Интернэшнл» ААҚ Халықаралық еуразиялық әуе компаниясы Директорлар кеңесінің төрағасы.

2007-2011 жылдары - ҚР Парламенті Мәжілісі 4-шақырылымының депутаты, Халықаралық істер, қорғаныс және қауіпсіздік комитетінің мүшесі болды. ҚР Қауіпсіздік кеңесінің мүшесі (2002 жылға дейін).

«Даңқ» (1997), «Барыс» (2008) ордендерімен; 14 медальмен марапатталған. «Жылдың әскери адамы» номинациясы бойынша Жыл адамы (Алтын Адам) (2000, 2001).

Оқи отырыңыз: Мемлекет басшысы Эмомали Рахмонды Тәжікстанның Тәуелсіздік күнімен құттықтады