Қаржылық мониторинг агенттігі Түркістан облысы бойынша аумақтық департаментінің қызметкерлері контрафактілік кір жуу ұнтақтарын дайындайтын астыртын цех қызметінің жолын кесті, деп хабарлайды Almaty.tv тілшісі Ulysmedia.kz-ке сілтеме жасап.
Жедел-іздестіру шаралары барысында Түркістан қаласының тұрғыны Р. Абдуллаев «Иштихат» тұрғын алабы, Доспанбет жырау көшесі н/ж мекенжайы бойынша цех ұйымдастырғаны, онда заңсыз жолмен Ariel, Тide, «Миф», Persil маркалы 2, 3, 6 кг көлемдегі ұнтақтар дайындағаны анықталып отыр.
«Ұнтақтарды буып-түюге және өлшеп-орауға арналған 7 жабдық, 500-ден астам ұнтақ қаптамасы, 20 кг-дық 100-ден астам ұнтақ, белгілі маркалардың атаулары бар полиэтилен пакеттер тәркіленіп алынды», – деп баяндайды құзырлы мекеме өкілдері.
Мамандар құқық иесі The Procter&Gamble Company компаниясына зор залал келтірілгенін айтады.
Р. Абдуллаевқа 5,9 миллион теңге көлемінде айыппұл салынды.