|
Qoǵam
12.10.2019 | 10:56

Алматыда бірнеше ноутбук ұрлаған 20 жастағы қыз ұсталды

Ол Lenovo маркалы екі ноутбукты алып кеткен

Алматыда бірнеше ноутбук ұрлаған 20 жастағы қыз ұсталды tengrinews.kz

Алматыда полицейлер сауда орталығында бірнеше ноутбук ұрлаған қызды ұстады, ол бейнебақылау камерасына түсіп қалған, деп хабарлайды Tengrinews.kz қалалық Полиция департаментіне сілтеме жасап.

"Бірнеше күн бұрын әлеуметтік желілерде жас қыздың суреті жарияланған болатын, ол бөтен мүлікті жасырын ұрлау арқылы Lenovo маркалы екі ноутбукін алып кеткен, осылайша дүкенге 300 мың теңге көлемінде материалдық шығын келтірген. Ол қылмысты ірі сауда орталығында, электроника және тұрмыстық техника дүкендерінде жасаған", - деді ПД криминалдық полиция басқармасының басшысы Жанболат Зиадин.

"Ұсталған қыздың кім екені анықталды, ол Алматы тұрғыны 1999 жылғы Т. есімді азаматша. Бұрын қылмыстық жауапкершілікке тартылмаған. Қыз ұсталды. Қазір тергеу барысында оның ұқсас қылмыстарға қатысы бар-жоғы анықталып жатыр. ҚР ҚК 188-бабы "Ұрлық" бойынша сотқа дейінгі тергеу басталды", - деп түсіндірді Зиадин.