Дубайда төбелес шығарған қазақстандықтарға қомақты айыппұл салынды

Біріккен Араб Әмірлігіндегі қонақ үйлердің бірінде ішімдікке сылқия тойып, төбелес шығарған қазақстандық туристерге қомақты айыппұл салынды, деп хабарлайды Almaty.tv тілшісі.

Біріккен Араб әмірлігі және Дубайдағы Қазақстанның бас  консулдығының мәлімдеуінше, заңы қатал араб елінде  тәртіп бұзғандарды қонақ үй әкімшілігі полицияға ұстап берген.  

Тәртіп сақшылары алкоголь ішу дерегі бойынша екі хаттама толтырып, істі  сотқа жолдаған. Қамалып кетуден аман қалған азаматтарға сомасы аса жоғары айыппұл салынған. Енді олар елге айыппұлды төлегенде ғана қайта алады. Біріккен Араб Әмірлігінің заңнамасында тіптен  шетелдіктерге де ішімдік ішуге қатаң тыйым салынған.