Жаңа жылдан бастап зейнетақы мен жәрдемақы мөлшері қаншаға өсетіні белгілі болды

1 қаңтардан бастап мемлекеттік жәрдемақылардың барлық түрлері мен базалық зейнетақы төлемі Қазақстан Республикасының Ұлттық банкі айқындаған инфляцияның болжамды деңгейіне сәйкес 7%, ынтымақты зейнетақы – 9%, яғни инфляция деңгейінен 2% озып кетті, деп хабарлайды  Аlmaty.tv тілшісі Аkorda.kz

Бюджеттен төленетін зейнетақының орташа жиынтық мөлшері (Бірыңғай зейнетақы қорынан төленетін төлемдерді есепке алмағанда) 2024 жылы 130 414 теңгені (2023 жылы – 120 838 теңге) құрайды.

Сонымен қатар 2023 жылдан бастап бес жыл ішінде ең төменгі базалық зейнетақының жыл сайынғы кезең-кезеңімен ең төменгі күнкөріс деңгейінің 70%, ал ең жоғарғысы 120% дейін өсетін болады.

Осылайша, 2024 жылғы 1 қаңтардан бастап базалық зейнетақының ең төменгі мөлшері ең төменгі күнкөріс деңгейінің 60%-дан 65%-ға дейін ұлғайтылды, ол 28 215 теңгені құрайды, ең жоғары мөлшері ең төменгі күнкөріс деңгейінің 100-ден 105% дейін, ол 45 578 теңгені құрайды.

2024 жылғы 1 қаңтардан бастап мемлекеттік жәрдемақылар:

1, 2, 3 бала туғанда төленетін жәрдемақы 131 100 теңгеден 140 296 теңгеге, 4 және одан да көп бала туғанда 217 350 теңгеден 232 596 теңгеге дейін өсті;

4 балалы отбасыларға 55 304 теңгеден 59 183 теңгеге, 10 балалы отбасыларға - 138 000 теңгеден 147 680 теңгеге дейін өскен көпбалалы отбасыларға берілетін жәрдемақы мөлшері бала санына байланысты;

I топтағы мүгедектерге берілетін жәрдемақы 89 248 теңгеден 95 496 теңгеге, II топ – 71 398 теңгеден 76 397 теңгеге, III топтағы мүгедектерге – 48 681 теңгеден 52 089 теңгеге ұлғайды.

- Мемлекеттік әлеуметтік сақтандыру қорынан (бұдан әрі – МӘСҚ) асыраушысынан айырылу және еңбекке қабілеттілігін жоғалту бойынша төлемдер де 7%-ға өсті. Бұл төлемдер міндетті әлеуметтік сақтандыру жүйесіне қатысушыларға қосымша төленеді, - деді Еңбек және халықты әлеуметтік қорғау министрлігі.

Төлемдердің мөлшері жеке болады және соңғы екі жылда Мемлекеттік әлеуметтік сақтандыру қорына аударылған әлеуметтік аударымдардың орташа айлық табысына, мүгедектік деңгейіне, асырауындағылардың санына, міндетті әлеуметтік сақтандыруға қатысу өтіліне байланысты болатыны атап өтілді.

Қазақстанда 2024 жылдан бастап айлық есептік көрсеткіш, ең төменгі жалақы және басқа да есептік көрсеткіштер өсті.

Оқи отырыңыз: 2024 жылы баспана бағасы қандай болады