Қазақстандықтар 200 келіден астам алтын сатып алған

ҚР Ұлттық банкі қазақстандықтардың қанша алтын құйма сатып алғанын жария етті, деп хабарлайды ҚазАқпарат.

«Қазақстанда Ұлттық банктің аффинажды таза алтын құймаларын сату-сатып алу бағдарламасы 2017 жылдың мамырында қолға алынған болатын. Бағдарлама басталғалы бері жалпы салмағы 222,3 келі болатын 5 924 құйма сатылған. Оның ішінде екінші деңгейлі банктер арқылы салмағы 216,7 келі болатын 5 770 құйма сатылды», - делінген Ұлттық банктің ҚазАқпарат тілшісі сауалына берген ресми жауабында.

Ал айырбастау орындары былтыр жыл соңында бағдарламаға қосылған болатын. Олар 810 грамм болатын 37 құйма сатты.