Ақмола облысында жұмысшыны топырақ басып қалды

Ақмола облысында су құбырын тартып жатқан жұмысшыны топырақ басып, зардап шеккен ер адам оқиға орнында көз жұмды. Полиция аталған оқиға бойынша іс қозғады, деп хабарлайды Almaty.tv тілшісі ҚазАқпаратқа сілтеме жасап.

Ақмола облысы ПД баспасөз қызметінің мәліметінше, қайғылы жағдай Бұланды ауданында болған.

Анықталғандай, су құбырын орнатып жатқан ер адамның үстіне топырақ үйіндісі құлаған. Салдарынан ер адам алған дене жарақатынан көз жұмған. Қайтыс болған жұмысшының 41 жастағы Алматы облысының тумасы екені анықталды.

«Осыған байланысты Қылмыстық кодекстің 156-бабының 3-бөлігі бойынша «абайсызда адам өліміне әкеп соқтырған еңбекті қорғау ережелерін бұзу» бойынша сотқа дейінгі тергеп-тексеру қолға алынды. Сот-медициналық сараптама тағайындалды, мемлекеттік еңбек инспектор тексеруде», - деді ведомстводан.

Оқи отырыңыз: Енді қазақстандықтар ұялы байланыс қызметін алу үшін биометриядан өтуі тиіс