Елдігімізге сын болып тұр: депутат соңғы қоңырау шарасын басқа күнге ауыстыруды ұсынды

Мәжіліс депутаты Аманжол Әлтай Премьер-министрдің орынбасары Алтай Көлгіновке соңғы қоңырау шарасы өтетін күнге қатысты сауал жолдады, деп хабарлайды Almaty.tv тілшісі Azattyq Ruhy агенттігіне сілтеме жасап.

«Зұлматты жылдар қасіретін жадымызда сақтап, сабақ алу үшін 31 мамыр – Ашаршылық және саяси қуғын-сүргін құрбандарын еске алу күні болып белгіленді. Тоталитарлық жүйенің қанды қасабына іліккен миллиондаған жанның қасіретті тағдырына ойлана қарап, аяулы есімдерін ардақтай еске алып, шын көңілімізбен лайықты құрмет көрсете алмай келеміз», – деді депутат.

«Осы күні Алаш арыстарының рухына жасап жүрген құрметіміз олардың ескерткіші мен мемориалдық орынға гүл шоғын қою, сол жерлерде бірер парақ сөз оқудан аспай тұр», – Аманжол Әлтай.

«Елдің ел болуы үшін ғазиз бастарын бәйгеге тіккен арыстар мен қолдан жасалған зұлматтың аранына жұтылған жазықсыз бауырларымыздың әруақтары алдында осындай шарамен шектелуіміз ұят деудің өзі аз, бұл – елдігімізге сын болып тұрған жағдай. Оқу-ағарту министрінің 2022 жылғы 12 тамыздағы № 363 бұйрығына сәйкес, орта білім беретін мектептердегі соңғы қоңырау 36 оқу аптасының соңы – 31 мамыр болып бекітіліп отыр. Бұл шешімнің бейіт басында той жасағандай әсер етіп тұрғанын айтпасақ болмайды. Бұл министрлікте осыны уақытында аңғарып, дер кезінде бұл бұйрықта оңтайлы шешім ұсынуға түсінігі жететін бір адамның табылмағаны ма, шынымен?! Қайран боздақтардың рухына бір күнді де қимай, апыл-ғұпыл аза тұтқансып, іле-шала той тойлап, думандатып кете беретін болсақ, елдігіміз қайсы?! Адамшылығымыз қайсы?!», – деді ол.

Аманжол Әлтай осы себептен мектептердегі соңғы қоңырау күнін 30 мамырға, не болмаса 1 маусымға ауыстыру керек екенін айтты. Оның айтуынша, бұл – ешқандай талқылауды қажет етпейтін әділетті талап.

«Ең болмаса, 31 мамырда әлеуметтік желілердегі елдің бірлігін бүлдіретін, қоғамның діңгегін шірітетін адамдарды бір-бірін қаралау, ғайбаттау, жала жабу, өсектеу, қарғау секілді теріс әдеттерден тыйылуға шақырамын. 31 мамыр – азаттық үшін арпалысып өткен, мемлекет құру жолында мерт болған, ұлт үшін атылған, ұрпақ бақыты үшін азап шеккен асыл бабалар алдындағы парызымызды сезінетін, Алаш аманатына адал болуға құлшынатын күн. Сонымен бірге Ашаршылық және саяси қуғын-сүргін құрбандарын еске алу күні деп белгіленген 31 мамырға байланысты Үкімет осы күннің мән-маңызына, салмағына лайықты шараларды іске асыруға тиіс деп есептеймін», – деп сауалын толықтырды депутат Мәжілісте.

Сонымен қатар «Жалпыхалықтық үнсіз еске алу минуты» шарасы дәстүрлі өтуі керек. Сол сәтте ел бойынша бүкіл қозғалыс тоқтап, бір минуттық үнсіздік арқылы саяси қуғын-сүргін құрбандары мен ашаршылық құрбандарын еске алу қажет.

Онымен қоса, телеарналарда әзіл-қалжың, шоу бағдарламалар, эстрадалық концерттер тоқтатылып, оның орнына ел тарихындағы қасіретті күндерді жас ұрпақтың жетік түсінуіне жол ашатын мазмұнды бағдарламалар көрсетілуге тиіс.

«Ақпарат құралдарында атаулы күннің тарихи салмағын, тағылымдық мағынасын жан-жақты жеткізетін мақалалар болуы керек. Балабақшалар мен мектептерде, жоғарғы оқу орындарында балалар мен жастарға арнаулы дәріс, пікірлесу сағаты, зиялы қауым және тарихшылармен кездесу кешті өткізуді жолға қою қажет», – деп айтты ол.