Су тасқынынан зардап шеккендерге атаулы әлеуметтік көмек беріледі

Төтенше жағдай режимі жарияланған аудандар мен қалалардағы атаулы әлеуметтік көмек (бұдан әрі – АӘК) алушыларға осы жылдың II тоқсанында АӘК мемлекеттік мекемелерге жүгінуінсіз автоматты түрде ұзартылады, деп хабарлайды Аlmaty.tv тілшісі Қазақстан Республикасы Еңбек және халықты әлеуметтік қорғау министрлігінің ресми сайтына сілтеме жасап.

Қазіргі уақытта ҚР Еңбек және халықты әлеуметтік қорғау министрлігі нормативтік құқықтық актілерге қажетті өзгерістер енгізуде.

Автоматты түрде ұзарту су тасқынынан зардап шеккен өңірлердегі АӘК алушы отбасыларға мемлекеттік қолдауды уақтылы көрсетуге мүмкіндік береді.

Көмек көрсетуге алғаш рет өтініш білдіретін азаматтар электрондық үкімет порталы арқылы жүгіне алады.

Нормативтік құқықтық актілерге енгізілген тиісті түзетулермен https://legalacts.egov.kz/npa/view?id=15009752 сілтемесі бойынша танысуға болады.

Естеріңізге сала кетейік, АӘК-нің негізгі мақсаты – ақшалай төлемдер түріндегі қолдауды жүзеге асыру және отбасының еңбекке қабілетті мүшелерін жұмыспен қамтуға жәрдемдесудің белсенді шараларына тарту арқылы отбасын қиын өмірлік жағдайдан шығару.

АӘК келесілерді көздейді:

- табысы өңірлік ең төмен күнкөріс деңгейінің 70%-нан аспайтын азаматтарға тоқсан сайын әлеуметтік көмек тағайындау;

- 1 жастан 6 жасқа дейінгі табысы аз отбасылардағы әр балаға 1,5 АЕК мөлшерінде ай сайынғы қосымша төлем беру;

- жұмысқа орналастыру жолымен жұмыспен қамтуға жәрдемдесу, оқуға жіберу, өз ісін ашуға ынталанған отбасыларға гранттар беру және т.б.

2024 жылдың I тоқсанында 58,8 мың отбасы (312 мың адам) 7,8 млрд теңге сомасына АӘК алды.

Оқи отырыңыз: Алматыдан 30 тоннадан астам гуманитарлық көмек Атырау облысына жөнелтілді