194 елдімекен электр қуатынсыз қалды

Елімізде қатты желдің салдарынан 194 елдімекен электр қуатынсыз қалды. Бұл туралы ҚР Төтенше жағдайлар министрлігінен мәлім етті, деп хабарлайды Almaty.tv.

Ведомство мәліметінше, еліміздің бірқатар өңірінде қатты желдің салдарынан 4 қалада (Атырау, Талдықорған, Текелі, Павлодар қалаларында) 70 133 абонент және 6 облыста (Алматы, Атырау, Ақмола, Қарағанды, Солтүстік Қазақстан және Павлодар облыстары) 194 елді мекен электр қуатынсыз қалды. 

«Өткен тәулікте құтқару бөлімшелері Нұр-Сұлтан қаласы, Ақмола, Ақтөбе, Қарағанды, Қостанай облыстарында 814 адамды, оның ішінде 101 бала және 3 жүкті әйелді құтқарды және эвакуациялады. Авариялық-құтқару жұмыстарына ТЖМ, ІІМ, жергілікті атқарушы органдар мен жол қызметтерінен 539 адам және 277 техника жұмылдырылды. Ақмола, Қарағанды, Павлодар, Қостанай облыстарының жылыту пунктерінде 89 адам, оның ішінде 11 бала бар. Автожолдардың жабық учаскелерінде халықты эвакуациялау үшін уақытша жылынуға арналған 40 пункт дайындалды. Жол қызметтері қардан тазарту жұмыстарын жүргізуде», - деп атап өтеді министрліктен. 

ТЖМ-ның ақпаратына сүйенсек, халықты ескерту мақсатында ауа райының нашарлауы туралы 74 СМС-хабарлама жіберілді және «Дәрмен» мобильдік қосымшасы арқылы 56 хабарлама жолданды. Қазіргі уақытта автожолдардың 86 учаскесі жабылды. Оның 33-і республикалық және 53-і облыстық маңызы бар. Бұл ретте автокөліктердің жиналуы Қарағанды (593 бірлік техника), Ақмола (546), Қостанай (53) облыстарының және Нұр-Сұлтан қаласының (60) блокпостарында байқалады. 

Өткен тәулікте Нұр-Сұлтан, Алматы қалаларында, Ақмола, Алматы, Ақтөбе, Атырау, Жамбыл, Қарағанды, Қызылорда, Павлодар және Солтүстік Қазақстан облыстарында дауылды желдің салдарынан шатырлардың бұзылуы мен ағаштардың құлауы, сондай-ақ электр энергиясының ішінара ажыратылуы орын алды. 

Нұр-Сұлтан, Алматы қалаларында және Алматы облысында төтенше жағдайлардың салдарынан 6 адам, оның ішінде 3 бала зардап шекті. ТЖ министрлігінде төтенше жағдайды жою жөніндегі республикалық штаб құрылды. Ақмола, Ақтөбе, Павлодар, Қостанай, Қарағанды, Солтүстік Қазақстан облыстарында осындай штабтар жұмыс жүргізуде. Психологиялық көмек және ақпараттық қолдау көрсету үшін республикалық және аумақтық штабтарда жедел желі телефоны жұмыс жасайды.