Германияда қазы жасап сатып жүрген қазақ: Тапсырыс берушілер өте көп

Германияда тұратын қазақстандық Арман Болысбеков қазы айналдырып, оны сатумен айналысады. Ол ал­дағы уақытта қазыны бренд қылып, Гер­мания аймағына таратқысы келеді, деп хабарлайды Almaty.tv тілшісі turkystan.kz-ке сілтеме жасап.

Арман Болысбеков Герма­ния­дағы ав­томо­биль құрастырудың отаны саналатын Штут­гарт айма­ғын­да тұрады. Онда әлемге әйгілі Mercedes-Benz компаниясының за­уы­тында автоматтандыру бойын­ша электрші қыз­метін атқа­рады. Жұмыстан тыс уақытта Қыр­ғыз Респуб­ли­касы мен Молдави­я­дан келген досы үшеуі қа­зы айнал­ды­рып, оны сатумен айналысады. 

«Елде жүргенде үнемі қазы жа­сай­тынбыз. Германияға қоныс аударған соң, қазы әзірлейтін жерді іздеп таба алмадық. Сосын жылқы етін сатып алып, алғашында тек өзіміз үшін жасап жүрдік. Бірде Гер­ма­нияда құрылған «Qazan e.V.» атты неміс-қа­зақ қауымдастығының төрағасы Вале­рий Оствальдпен кездескенде ол «Сен неге қа­зы жасап сатпайсың? Біріншіден, ақ­ша табасың, екіншіден, ұлттық тағамды на­сихаттайсың, үшіншіден, атажұрттың дә­мін сағынып жүрген жандарға «жақсы­лық» жасайсың» деп идея беріп, қанаттан­ды­рып жіберді. Сөйтіп, бастапқыда бұл іс­­пен 5 жыл бойы жалғыз өзім айналы­сып жүрдім. Сосын сол қауымдастық ар­қылы Қырғыз Республикасынан келген Виктор есімді жігітпен таныстым. Ол Германияда қасапшының оқуын оқыған, тиісінше оған шұжық өнімдерін әзірлеуге рұқ­сат етілген. 

Айта кетерлігі, Германияда шұ­жық өнімдерін әзірлеп, сату үшін ар­найы рұқсатнама алуың қажет. Әйтпегенде бұл өнімдерді заңсыз түрде сататын бол­саң, тергеуге алып, тіпті түрмеге қамап қоя алады. Сосын арамызға Молдавиядан кел­ген Виталий қосылды. Виктор қазының не екенін бұрыннан біледі екен, бірақ бұған дейін жасап көрмеген. Ал Виталий қазы секілді тағам түрінің бар екенін осын­да келіп білді, бірақ ол қазыны бірден ұнат­ты. Сөйтіп, қазір соңғы 2 жылда осы екеуі­мен бірге қазы айналдырып, тапсы­рыс­тар аламыз», – дейді Арман.

Бір қызығы, қазыға көп тапсырыс беретіндер Қазақстанда туып-өс­кен, қазір Германияда тұратын не­міс­тер екен.

«М­е­ніңше, олардың басым көпшілігі тек қазы жейтін секілді. Сосын олар қазыдан сорпа әзірлейді. Оның үстіне, олар қазы­ның нағыз табиғи өнім әрі жегенге «жеңіл» екенін жақсы біледі. Немістерден бөлек, осында тұратын 3-4 қазақ отбасы да жиі тапсырыс береді», – деді ол.

Ендігі Арманның мақсаты алдағы уақытта қазыны брендке айналдырып, Гер­мания аумағындағы дүкен сөрелеріне қою.

«Осында орыстардың ірі дү­кен­дер желісі кең таралған. Бұл дүкен­дердің сөрелерінде орыстардың дәстүрлі тағамдары көптеп сатылатыны айтпаса да түсінікті. Бір танысымыз арқылы сол дү­кендердің біріне екі-үш рет қазы қойып, сат­қан едік, тез арада өтіп кетті. Алдағы уа­қытта жекелей клиенттерден бөлек, сол орыс дүкендеріне арнайы тапсырыспен әзір­легіміз келеді. Бүгінде бұл өнімді өтім­ді ету үшін қолымыздан келгеннің бар­лығын жасап жатырмыз. Қазір сыртқы қап­тама, сондай-ақ вакуумдық орауыштың қалай болатынын ойластырып жатырмыз. Одан бөлек, құрамы мен қайда жасалғанын білдіртетін жапсырма қағаз әзірлеудеміз. Со­нымен қатар сыртында қазақ өнімі еке­нін білдіретін өрнек салу ойымызда бар», – дейді Арман.