«АЯЛА» қайырымдылық қоры № 10 мектеп-интернатта 2 шеберхана ашты

Бүгін «АЯЛА» қайырымдылық қоры «Кәсіби бағдарлау» жобасы шеңберінде Алматы қаласындағы № 10 мектеп-интернатта екі шеберхана ашты. Бұл мектепте күнкөрісі төмен және көпбалалы отбасылардың балалары оқиды. Енді олардың демеушілердің қолдауымен сатып алынған ең озық жабдықта тігін ісінің және ағаш шеберлігінің тамаша дағдысын игеруіне мүмкіндігі бар, деп хабарлайды Almaty.tv.

№10 мектеп-интернатта тігін және ағаш шеберханасы 2016 жылы демеушілердің көмегінің арқасында пайда болған еді. Бірақ ол кезде құралдар мен материалдардың ең аз жиынтығымен жабдықталды, сондықтан балалар тігудің және ағашпен жұмыс жүргізудің ең негізгі дағдыларын үйрене алды. Енді олардың екі толымды шеберханасы бар, олар арқылы күн сайын 100-ге жуық жасөспірім оқудан өтеді.

  Ағаш шеберханасына заманауи шеберүстел, «үшеуі бірге» функциясы бар ағаш арасы, бұрғылау және қайрау станоктары, екі ажарлағыш машина, бірнеше ою арасы, бұрғы, бұрама шегені бұрағыш, шарқайрақ, металл және ағаш қол арасы – жалпы 903 400 теңге сомаға барлығы 40-тан астам жабдықтар орнатылған. Ағаш шеберханасындағы сабақтарды үлкен жұмыс тәжірибесі бар педагог Әділ Жолдасбайұлы Бекбердиев жүргізеді. Оның балаларды оқыту жоспары үлкен: азық-түлік турайтын тақтайлар, отырғыштар, үстелдер жасау, мектептің ағаш жиһазын жөндеу. Қазір мұның барлығын сатып алуға немесе тапсырыс беруге болатын сияқты. Бірақ Әділ Жолдасбайұлы мұндай шеберхана балалардың оқуда неғұрлым жинақы және зейінді болуына көмектеседі деп санайды. Сондай-ақ ересек өмірге пайдалы практикалық дағды алуына көмектеседі, оларды жиһаз жинауға, тұрғын үй жөндеуге және бәлкім, болашақ кәсібінде қолдануға мүмкіндік туады.

«Жай киімді немесе төсек ақжаймасын өз бетінше пішу және тігу, матаны немесе киімді әдемі кестелеу, шалбарды, көйлекті, белдемшені жөндеу немесе қайырып тігу – осындай күнделікті өмірге қажетті дағдыны қыздар біздің жаңа шеберханада үйренеді. Ал мұны заманауи қауіпсіз және жайлы жабдықта жасау бәріне ұнайды және ынталандыра түседі», - деді ұстаз Алмагуль Сейфуллинқызы.

Бес тігін машинасы, оның ішінде бір өнеркәсіптік, үш жіптік торлағыш, бумен жібіткіш, үлкен ыңғайлы пішетін үстел, үш тігін манекені, үтік, үтіктеу тақтасы, жіптер, қайшылар, инелер жиыны – барлығы 552 050 теңге сомаға 18 аталым осы тігін шеберханасы үшін жабдықтардың толық жиынтығын құрайды.

«Кәсіби бағдарлау» жобасын іске асырудың 6 жылы ішінде біздің қор 5 курс ұйымдастырды, 19 арнайы шіберхана ашты, ондаған тамаша және үйретуге құштар адамдарды педагог және тәлімгер ретінде тартты. Біз 5 баланы шаштараз шеберлігіне, 20 – тігін шеберлігіне оқыттық. 60 жасөспірім үй жағдайында қарапайым тамақ дайындау курсынан өтті. Жоғары сыныптардың 30-дан астам оқушылары әлеуметтік желілер үшін қызықты бейне-контент жасауды үйренді. Алматыдағы 2 мектеп-интернаттың және облыстық балалар үйінің 21 жасөспірімі осы аптада визаж, нейл-стилист, ТД-жүргізушісі және журналист, сайт жасау және автоэлектрик курстарында оқуын бастады. Бүгін біз № 10 мектеп-интернатта екі заманауи және қауіпсіз шеберханалардың жұмыс істей бастағанына қатты қуанып отырмыз. Осы жобаға қолдау көрсеткен «Орифлэйм» компаниясына үлкен алғысымызды білдіреміз. Бұл шеберханалардағы сабақтар көптеген жасөспірімдердің өзіне және өз күшіне сенімді болуына көмектесетініне, ал кейбіреулеріне болашақ кәсібіне және тіпті өз ісін бастауына жол ашатынына сенімдіміз», - деді «АЯЛА» қорының президенті Айдан Сүлейменова.