Алматыда "Қалқан" қысқы жасөспірімдер спартакиадасы басталды

Алматыда "Қалқан" қысқы жасөспірімдер спартакиадасы басталды, деп хабарлайды Almaty.tv.                                  

Жарыс бағдарламасына президенттік көпсайыс жаттығулары, атап айтқанда жасөсіпірімдер үшін белтемірде тартылу, қыздар үшін шалқалап жатып денені көтеру, сондай-ақ үш шақырымдық шаңғы жарысы және пневматикалық мылтықтан оқ ату кіреді.

Іс-шараны ұйымдастыруға Қорғаныс министрлігінің Орталық спорт клубы, Қарулы күштердің Ұлттық әскери-патриоттық орталығы және "Жас сарбаз" республикалық балалар-жасөспірімдер әскери-патриоттық қозғалысы мұрындық болды. Жарысқа қозғалыстың жалпы саны 45 тәрбиеленушісі еліміздің түкпір-түкпірінен күштік жаттығулардан, нысананы дәл көздеуден және жылдамдықтан бағын сынауға келді. Ережеге сәйкес спартакиада 14-17 жасқа дейінгі жасөспірімдер арасында өтеді.

Жарыстың салтанатты ашылуында жас сарбаздықтарға арнап Қорғаныс министрлігі Спорт комитетінің төрағасы – Орталық спорт клубының бастығы полковник Арман Әбеуов, Қарулы күштер Ұлттық әскери-патриоттық орталығының бастығы Арман Әсенов, "Жас сарбаз" республикалық балалар-жасөспірімдер әскери-патриоттық қозғалысының төрағасы майор Мейірбек Меңдіғалиев сөз сөйледі.

– Мұндай жарыстар жеткіншектерге шынығып, төзімділік пен көшбасшылық қасиеттерді дамытуға ықпал етеді. Бұдан өзге сайыс бірлікті көрсету және ұжымдық рухты қалыптастыру үшін тамаша мүмкіндік, – деп атап өтті полковник А. Әбеуов.

Жас сарбаздықтардың қысқы спартакиадасы үшінші жыл қатарынан өткізіліп жатыр. Бұл жолы оған 15 команда қатысуда. Командалық есепте жеңімпаздар спортшылардың жинаған ұпай санына қарай анықталады.