Алматының кей аудандарында суық су өшіріледі

Алматы қаласы Медеу ауданының жоғарғы бөлігі түнде суық судан ажыратылады, деп хабарлайды Almaty.tv тілшісі «Алматы су» МКК баспасөз қызметіне сілтеме жасап. 

9 маусымға қараған түні сағат 00:00-ден таңғы 06.00-ға дейін Медеу ауданындағы Әл-Фараби даңғылының жоғары жағында орналасқан елдімекендерге, соның ішінде Таулы Қырат, Көктөбе, Юбилейный, Каменское плато шағын аудандарында суық су беру тоқтатылады.

Самал 1,2,3 шағын аудандарындағы желілердегі су қысымы төмендейді.

Суық суды уақытша ажырату жөніндегі шектеулер сумен жабдықтау нысандары мен желілеріндегі апаттық-қалпына келтіру жұмыстарын орындау үшін қажет.

«Апаттық жұмыстар аяқталғаннан кейін сумен жабдықтау схемаларын түзету және қалпына келтіру қажеттілігіне байланысты 9 маусымда сағат 16.00-ге дейін көрсетілген аймақтағы желілерде су қысымы қысқа мерзімге төмендеуі мүмкін. Өтінім бойынша денсаулық сақтау және әлеуметтік сала объектілеріне су жеткізу қамтамасыз етіледі. Уақытша келтірілген қолайсыздықтарға түсіністікпен қарауды сұраймыз. Анықтама телефоны: 274-66-66», – делінген хабарламада.