Жеке инвестиция: Алматыда халықаралық стандарт бойынша салынған студенттер жатақханасы ашылды

Алматы әкімі Ерболат Досаев жеке инвестициялар есебінен салынған болашақ ұстаздарға арналған жаңа заманауи студенттер жатақханасына барды, деп хабарлайды Almaty.tv.

1 млрд 350 млн теңгенің жобасын «Karazhal operating», «Rise capital», «Daco Motors KZ», «San tyres», «Pine education», «Kazintel group» және т.б. 50-ден астам компанияны, меценат пен инвесторды біріктірген «Mugalim» қоғамдық бірлестігі жүзеге асырды.

Алматының Бостандық ауданындағы Жароков және Дунаевский көшелерінің бойындағы учаскеде 6 жылдан астам уақыт бойы иесіз, қараусыз қалған ғимарат болған. 

Ауданы 2 мың шаршы метр және жобалық қуаты 200 адамға дейінгі студенттердің жаңа үйі Йель, Оксфорд университеттері сияқты ЖОО жатақханаларының халықаралық стандарты бойынша салынған. Онда коворкинг-орталық, конференц-зал, Study room, шатырдағы үлкен терраса бар.  Жатақхана Абай атындағы Қазақ ұлттық педагогикалық университеті, Қазақ ұлттық қыздар педагогикалық университеті, Қазақ ұлттық университеті, С. Демирель атындағы университет және т.б. жоғары оқу орындарының болашақ оқытушы-студенттеріне арналған.

- Жаңа заманауи жағдайда жайлы өмір сүру мүмкіндігінің пайда болғанына қуаныштымыз. Жобалармен жұмыс істеуге, шығармашылықпен айналысуға болатын коворкинг орталығы бар, барлық жағдай жасалған. Бұл - пәтер жалдауға қалтасы көтермейтін студенттерге таптырмас дүние, - деді Абай атындағы Қазақ ұлттық педагогикалық университетінің студенті Жанерке Тоқтарова.

Сапар барысында Алматы әкімі Ерболат Досаев нысандардың қаланың әлеуметтік инфрақұрылымын жақсарту үшін маңызы зор екенін атап өтті. 

- Мұғалімдердің мәртебесін көтеру үшін уақыт талабына сай қолайлы жағдай жасау маңызды. Ол - тек заманау мұғалім ғана емес, сонымен қатар әдіскер, тәлімгер, тәрбиеші. Қала атынан алғыс айтып, меценаттарды маңызды әлеуметтік жобаларды іске асыруға белсенді қатысуға шақырамын, - деді Е.Досаев.

«Mugalim» ҚБ-ның айтуынша, тағы бірнеше білім беру нысанын салу жоспарланған.  Жыл соңына дейін Zhibek Dorm қоғамдық бірлестігінің меценаты тағы 100 орындық жатақхана салуды жоспарлап отыр. Сондай-ақ «Mugalim» ҚБ 110 орындық студенттер үйін (меценат – Yamoto ЖК) және 135 орындық жатақхананы («Кемел» жеке қоры) жүзеге асыруды жоспарлап отыр.

Оқи отырыңыз: Алатау ауданының прокуратурасы оқушыларға сынып сағатын өткізді