Тұрғын үй, жаңа мектеп, кәсіпорын: Алатау ауданының әкімі биылғы жоспарымен таныстырды

Биыл Алматының Алатау ауданында жалпы көлемі 60 мың шаршы метрді құрайтын тұрғын үй пайдалануға беріледі, деп хабарлайды Аlmaty.tv.

Сондай-ақ, Алғабас шағынауданында 600 орындық мектеп ашылады. Оған қоса, тағы 3 мектептің сметалық құжаттары дайындалып жатыр. Ал 2019 жылы Индустриалды аймақта 8 өндірістік кәсіпорын ашу жоспарланған.  Жалпы, 490 гектарды құрайтын аумақта барлығы 40 жоба мақұлданыпты.

«40 жобаның бүгінгі күні 5-уі іске қосылды. Жалпы, инвестиция көлемі 17 млрд 860 млн теңгені құрады. Олар: көкөніс өсіруге арналған жылыжай кешені, кеңсе техникаларына арналған картридж шығару. 2019 жылы 2 сауда орталығы, 1 супермаркеттің ашылуы жоспарлануда. Олар: «Алатау-3», «Алатау-4» сауда орталықтары және «Cаялы» ықшамауданында «Аржан супермаркеті», – деді Алматы қаласы Алатау ауданының әкімі Шахмерден РЫСБАЕВ.

Айта кетейік, биыл 5 шағынауданда жалпы ұзындығы 107 шақырымды құрайтын жол жөнделеді. 70 шақты аялдама орнатылады. Сонымен қатар, 23 миллион теңгеге 18 жүргіншілер көпірін күрделі жөндеуден өткізу үшін құжат жасауға тапсырыс берілді.