Қазақша тіл таңдамаймыз, банкомат істемей қалады: «Сбербанк» түсініктеме берді

Түркістан қаласындағы «Сбербанк» банкоматында жапсырылған «Қазақша тіл таңдамаймыз, себебі, банкомат істемей қалады» деген ескертпесі желі қолданушыларының ашуын туғызды, деп хабарлайды Almaty.tv тілшісі.

«Түркістан, #сберленгендіктеріңізбен! «Сбербанк Қазақстан», бұл қалай сонда? Банкомат Түркістан қаласындағы «Сбербанк» филиалында орналасқан», – деп жазады желі қолданушысы Әкім Тұрсын.

Аталған фотодерекке байланысты «Сбербанк Қазақстан» баспасөз қызметі пікір білдірді.

Банктың ресми мәлімдемесінде банкоматқа жапсырылған хабарлама қағазды банк қызметкері ешкіммен келіспей, өзі жабыстырғаны айтылған.

«Аталған фотодерек бойынша төмендегі жайтты хабарлаймыз:

Мәселенің анық-қанығын тексеру барысында банкоматтағы хабарлама қағазды банк қызметкері ешкіммен келіспей, өзі жапсырғаны анықталды. Аталған қызметкермен, сондай-ақ, басқа да қызметкерлермен жиын өткізіліп, болашақта басшылықпен келіспей мұндай әрекетке жол бермеулері туралы түсіндірілді және қатаң тапсырылды. Мұқияттылық танытқаныңыз үшін алғыс білдіреміз.

Аталған келеңсіз жағдай үшін кешірім сұраймыз», – делінген банк хабарламасында.