Алматы электр стансасы жылыту маусымына дайын ба

Алматы электр стансасы жылыту маусымына 70 пайыз дайын. Дегенмен қазірдің өзі аталған кешенде жөндеу жүріп жатыр, деп хабарлайды Almaty.tv тілшісі.

Жақұтов атындағы Алматының ЖЭО-2 – елдегі ең ірі станса саналады. Мұндағы үш энергия көзі, Батыс жылу кешені мен екі бірдей жылу электр стансасы мегаполистің күзгі-қысқы маусымдағы жайын қамтамасыз етіп келеді. Биыл да орталықтағы 8 қазандық пен 6 турбоагрегат күрделі жөндеуден өтеді.  

– Биыл біздің кәсіпорындарға 10,1 млрд теңге бөлінді. Ол – жөндеу жүргізу үшін берілген қаражат. Ал екінші жылу-электр орталығының өзінде 6 млрд теңгеге жуық қаржы бар. Бүгінде жартысынан астамы игерілді. Тиісті жұмысты 1 қарашаға дейін аяқтауды жоспарлап отырмыз, – деді «Алматы электр стансалары» АҚ  басқарма басшысы орынбасарының міндетін атқарушы Алексей Скрябин.

Стансадағы жабдық шамамен 78 пайызға тозған. Бұл өз кезегінде жаңа қуатты енгізу қарқынының төмендеуіне әсер етуі мүмкін. Сондай-ақ қолданыстағы өндіруші көздердің қауіпсіздік деңгейіне қауіп тумақ. Мамандар «осындай қатердің алдын алу үшін жұмыс істеліп жатыр» дейді. Әсіресе қыс кезінде халықтың жылусыз қалмауына баса назар аударылуы тиіс.

– Энергожүйесі білікті мамандармен қамтылған. Жөндеу жұмыстарына барлық керекті жабдық алынып, жөндеу жұмысы бекітілген. Кесте бойынша жүргізіліп жатыр, – деді А. Жақұтов атындағы ЖЭО-2 бас инженері Бауыржан Қалиев

Аталған стансада реттелетін қызметтерге арналған инвестициялық бағдарлама іске асады. Биыл жоспарға сай негізгі 70 жабдық пен 2 жылу магистралі жөнделуі тиіс.

– Биыл Алматы электр желілері бойынша тариф өзгермейді. Дегенмен 2024-2026 жылдары баға басқаша болады. Біз алдағы 5 жылдықта түрлі факторды ескеріп, кезең-кезеңімен тарифті көтеруді жоспарлап отырмыз, – деді Табиғи монополияларды реттеу комитетінің Алматы қаласы бойынша департамент басшысы Әсел Бөденеева.

Алматыда жылыту маусымы шамамен, қазанның ортасында басталады. Ал стансадағы күрделі жөндеу 1 қарашада аяқталмақ. Бұл тұста мамандар «алаңдауға негіз жоқ. Орталықтағы жұмыс қала халқының жылумен қамтылуына әсер етпейді» деп сендірді.

Мадина Оқас, Ғани Қалуов, «Алматы» телеарнасы

Оқи отырыңыз: Абай даңғылын орташа жөндеу жұмыстары мерзімінен бұрын аяқталды