Алаяқтардан сақ болыңыз - полиция кеңесі

Қазіргі уақытта алаяқтық әдістері күн санап түрленіп, қылмыскерлер азаматтардың сеніміне кірудің сан түрлі айла-шарғысын қолданып жатыр. Осы тұрғыда ІІМ өкілдері азаматтарға ескерту жасады, деп хабарлайды Almaty.tv.

Ведомство мәліметінше, алаяқтар көбіне өздерін банк қызметкерлері, құқық қорғау органдарының өкілдері немесе коммуналдық қызмет мамандары ретінде таныстырып, адамдарға психологиялық қысым көрсету арқылы жеке деректер мен банк шоттарына қол жеткізуді көздейді.

Алаяқтардың басты мақсаты - сенгіш азаматтарды асықтырып, қорқыту немесе алдау арқылы олардың жинаған қаражатын иемдену.

Осыған байланысты полиция қызметкерлері тұрғындарды барынша сақ болуға шақырады.

Бөтен адамдарға жеке мәліметтерді бермеу, күмәнді қоңыраулар мен күдікті хабарламаларға сенбеу - қаржылық қауіпсіздіктің басты шарты.

Кез келген алынған ақпаратты тек ресми дереккөздер арқылы тексеріп, күмәнді жағдайда тиісті мекемелердің сенім телефондарына хабарласу қажет.

Есіңізде болсын, қызметкерлер ешқашан телефон арқылы құпия парольдерді немесе карта мәліметтерін сұрамайды. Сондықтан әрбір азаматтың қырағылығы мен сақтығы - алаяқтықтан қорғанудың ең тиімді жолы болып қала бермек.

Оқи отырыңыз: Қазақстан өңірлерінде риелтор қызметі қанша тұрады