Алматы мен жапондық Rakuten Sports спорттық туризмді дамытады

30 қыркүйекте Almaty Tourism Bureau мен Rakuten Sports спорттық және оқиғалық туризм саласындағы ынтымақтастық туралы меморандумға қол қойды, деп хабарлайды Almaty.tv.

Тараптар бірлескен жобаларды дамытып, Алматыда халықаралық спорттық іс-шаралар мен турнирлер өткізу мүмкіндігін қарастыруды жоспарлап отыр. Бұл туралы Қалалық туризм басқармасының өкілдері хабарлады.

Құжат Rakuten Group компаниясының контент-бизнес және ойын-сауық бағытының вице-президенті Митч Такахаси бастаған Rakuten Sports делегациясының Алматыға ресми сапары барысында қол қойылды.

Келіссөздер барысында тараптар бірлескен жобалардың ықтимал форматтарын, Алматыда халықаралық турнирлер өткізу мүмкіндігін, сондай-ақ оларды шетелдік нарықтарда ілгерілету мәселелерін талқылады.

Almaty Tourism Bureau мен Rakuten Sports арасындағы ынтымақтастық 2025 жылы сәуірде Сингапурде өткен The Meetings Show Asia Pacific халықаралық MICE көрмесінде басталған. Сол кезде екі команданың алғашқы B2B кездесуі өтіп, бірлескен жұмыстың болашағы зор бағыттары айқындалды. Меморандумға қол қою келіссөздердің келесі кезеңіне айналды.

«Rakuten Sports-пен диалогты былтыр сәуірде Сингапурде бастадық. Бүгінде келесі кезеңге — нақты бірлескен жобаларды пысықтауға көшіп отырмыз. Атап айтқанда, Алматыда халықаралық спорттық іс-шаралар мен турнирлер өткізу мүмкіндігін талқылап жатырмыз. Мұндай жобалар оқиғалық туризмді дамытуға, шетелдік аудиторияны тартуға және Алматыны халықаралық нарықта ілгерілетуге ықпал етуі мүмкін», — деді Almaty Tourism Bureau директоры Марлен Маралов. 

Rakuten Sports Жапониядағы ірі технологиялық топтардың бірі – Rakuten Group құрамына кіреді. Топпен кәсіби футболдан Vissel Kobe клубы, бейсболдан Tohoku Rakuten Golden Eagles және Rakuten Monkeys командалары байланысты. Rakuten халықаралық спорттық серіктестіктерімен де танымал. Компания бұған дейін FC Barcelona клубының бас серіктесі болып, Golden State Warriors командасымен, Davis Cup, Spartan Race және басқа да халықаралық спорт ұйымдары мен жобаларымен ынтымақтастық орнатқан. 

Қол қойылған меморандум кәсіби байланысты дамыту, тәжірибе және ақпарат алмасу, сондай-ақ спорттық және оқиғалық туризм саласындағы бірлескен бастамаларды пысықтауды көздейді.

Алматы үшін Rakuten Sports-пен ынтымақтастық халықаралық спорттық іс-шараларды тартуға, оқиғалық туризмді дамытуға және қаланы шетелде танытуға жол ашады.