Алматыда «ақылды» камералар үш жылдан бері іздеуде жүрген азаматты анықтады

Қарағанды қаласының аса ірі көлемде алаяқтық жасағаны үшін іздеуде жүрген 37 жастағы тұрғыны Алматыда бейнебақылаудың бет-әлпетті тану функциясымен жабдықталған бейнебақылау жүйесінің көмегімен ұсталды, деп хабарлайды Аlmaty.tv тілшісі Polisia.kz-ке сілтеме жасап.

Күдікті жәбірленушіге 44 миллион теңгеден астам материалдық шығын келтірген. Сот үкіміне сәйкес пробациялық бақылауда болған ол 2023 жылы тұрғылықты жерін өз бетінше тастап, белгісіз бағытқа бой тасалаған.

Үш жыл бойы құқық қорғау органдарынан жасырынғанына қарамастан, оны іздестіру жұмыстары бір сәтке де тоқтатылған жоқ. Жедел ақпараттың нәтижесінде іздеуде жүрген азаматтың Алматы қаласында жүргені анықталды.

Бір қызығы, оны ұстау үшін полиция қызметкерлеріне арнайы жедел-іздестіру іс-шараларын жүргізудің қажеті болмады.

Заңнан қашып жүрген азамат үшін шешуші сәт супермаркеттердің біріне барған кезде болды. Дәл сол жерде ол қалалық бейнебақылау жүйесінің камерасына түсіп қалған.

Заманауи технологиялар нейрожелі мүмкіндіктерін пайдалана отырып, оның бет-бейнесін іздеуде жүрген тұлғалардың деректер базасымен салыстырып, жеке басын дәл анықтады.

Жүйеден түскен дабыл бойынша жергілікті полиция қызметкерлері жедел әрекет етіп, қарағандылық азаматты ұстады.

Жеке басы расталғаннан кейін Қарағанды облысы полициясының құжаттарына сәйкес ол туған қаласына этаппен жеткізілді. Қазіргі уақытта ер адам қамауда отыр және сот шешімін күтіп отыр.

Алдағы уақытта бұрын шығарылған пробациялық бақылау туралы сот үкімінің күшін жою мәселесі қаралып, жазаның өтелмеген бөлігін бас бостандығынан айыру түрінде өтеу туралы шешім қабылданады.

Оқи отырыңыз: Алматы тұрғыны қарияны тонап кеткен күдіктіні ұстауға көмектесті