Алматыда жол қауіпсіздігін қамтамасыз ету бойынша жұмыстар күшейтілді

Алматыда жол қауіпсіздігін қамтамасыз ету бойынша профилактикалық жұмыстар күшейтілді,  деп хабарлайды Almaty.tv тілшісі Polisia.kz-ке сілтеме жасап.

Алматы қаласында қалың қардың жаууына байланысты жолдағы жағдай күрделене түсті. Осыған орай полиция жол қозғалысына қатысушыларды барынша сақ болуға және жол қозғалысы ережелерін қатаң сақтауға шақырады.

Әкімшілік полиция басқармасының мәліметінше, өткен тәулікте – кешегі түстен бүгінгі күнге дейін – қала жолдарында 62 жол-көлік оқиғасы тіркелген. Оның ішінде 28 жол апаты зардап шеккендермен аяқталған. Қаза тапқандар жоқ.

Алматы қаласы полиция департаменті әкімшілік полиция басқармасының бастығы Серік Шумаев жүргізушілерге ауа райы жағдайын ескеріп, қауіпсіз жылдамдықты таңдаудың маңызын атап өтті.

– Қардың жаууы мен көрінудің нашарлауы жүргізушілерден ерекше мұқияттылық пен тәртіпті талап етеді. Автокөлік иелерін жылдамдық режимін қатаң сақтауға, арақашықтықты ұлғайтуға және күрт маневр жасаудан аулақ болуға шақырамыз. Сондай-ақ жаяу жүргіншілердің қауіпсіздігіне ерекше назар аудару қажет, – деді ол.

Спикердің айтуынша, қазіргі уақытта полиция қызметкерлері күшейтілген режимде қызмет атқарып, жол жағдайын бақылауда ұстап отыр. Сонымен қатар олар қаладағы коммуналдық қызметтермен бірлесіп жұмыс істеуде.

– Жолдағы қауіпсіздік әрбір жүргізушінің жауапкершілігіне тікелей байланысты. Әсіресе қар жауған кезде жол қозғалысы ережелерін сақтап, бір-біріне құрметпен қарау аса маңызды, – деп түйіндеді Серік Шумаев.

Полиция қолайсыз ауа райы жағдайында жүргізушілерге жылдамдықты төмендетіп, арақашықтықты сақтауды және қажет болмаса алыс жолға шықпауға кеңес береді.

Оқи отырыңыз: Алматыда оқушылар олимпиадаларға виртуалды көмекшінің жетекшілігімен дайындалады