Ауыл шаруашылығын қаржыландыруда 300 млрд теңгеге жуық заңбұзушылық анықталған

Агроөнеркәсіп кешенін 2023-2024 жылдары қаржыландыруға жүргізілген аудит нәтижесінде анықталған заңбұзушылықтардың жалпы көлемі шамамен 300 млрд теңгені құраған. Оның ішінде бюджеттің тікелей шығындары 32 млрд теңге болып отыр, деп хабарлайды Almaty.tv.

Үкіметтің баспасөз қызметінен хабарлағандай, соңғы екі жылда АӨК-ті мемлекеттік қолдау шараларына шамамен 1,2 трлн теңге бөлінген.

Қаржы министрі Мәди Такиев бөлінген қомақты қаражаттың күтілетін экономикалық нәтиже мен халыққа нақты пайда әкелмей игеріліп жатқанын атап өтті.

"Тексеру барысында субсидиялау жүйесінде бірқатар заңбұзушылық анықталды. Атап айтқанда, шаруаларды субсидиялау кезінде 5,5 млрд теңге көлемінде көлеңкелі схемалар белгілі болды. 11 өңірде субсидия алушылар арасында 808,1 млн теңгеге бір ірі қара малды жалған сату жағдайлары тіркелген", - деп атап өтті ведомство басшысы.

Сонымен қатар бюджеттік кредиттер есебінен жүзеге асырылатын агроөнеркәсіп кешенінің инвестициялық жобалары бойынша 13,3 млрд теңге сомасына заңбұзушылықтар анықталды.

Мал мен жабдықтың мүлдем жеткізілмегені немесе аз мөлшерде жеткізілгені, сондай-ақ төленгенімен іс жүзінде орындалмаған құрылыс жұмыстары тіркелді.

Бұдан бөлек, мерзімі өткен берешегі бар және қолданыстағы тыйым салулары болған қарыз алушыларға микронесие беру кезінде де өрескел бұзушылықтар анықталған.

Жалпы берешегі 45,8 млн теңгені құрайтын 25 қарыз алушыға 177,7 млн теңге көлемінде несие берілген.

Оқи отырыңыз: Жекеменшік мектептер мен АӨК-тегі қаржы заңбұзушылықтары: Үкімет аудит қорытындысын жариялады