Ашық есік күні: 21 ақпанда Бейнеуде сарбаздар ата-анасымен кездесе алады

Биылғы жылдың 21 ақпанында Бейнеу кентіндегі Қазақстан Республикасы Қарулы күштері Құрлық әскерлері «Батыс» өңірлік қолбасшылығының 99116 әскери бөлімінде әскерде борышын өтеп жүрген сарбаздардың ата-аналары үшін Ашық есік күні өтеді, деп хабарлайды Аlmaty.tv.

Іс-шара әскер қызметінің ашықтығы мен айқындығын қамтамасыз ету, әскери қызметшілердің отбасыларымен сенім мен тікелей диалогты нығайту мақсатында өткізілмек.

Әскери бөлім басшылығы мен бөлімше командирлері ата-аналармен кездесу өткізіп, толғандырып жүрген барлық сұрақтарға жауап береді. Балаларының қызметіне қатысты қажетті түсініктемелер беріліп, барлық тақырып ашық диалог форматында талқыланады.

Бұл күні ата-аналар жауынгерлік даярлық барысы, күн тәртібі, қызмет өткеретін орындар, тамақтану және жеке құрамның демалу шарттарымен таныса алады. Бөлімшелердің материалдық-техникалық базасы көрсетіледі. Бұдан басқа тәрбие жұмысы, психологиялық қолдау және әскери қызметшілерді Отанды қорғау жөніндегі міндеттерді орындауға даярлау мәселелері де түсіндіріледі.

Қазақстан Республикасының Қорғаныс министрлігі әскери қызметшілердің ата-аналарымен өзара іс-әрекет әскердің ашықтығының маңызды элементі екенін атап өтіп, іс-шараға белсенді қатысуға шақырады

Оқи отырыңыз: Жағымды ашып, тамақ ішіп жүрмін: әскерде жарақат алған сарбаздың жағдайы қалыпты