Балалардың терезеден құлау дерегі көбейіп жатыр - Бас прокуратура

Қазақстанда күннің ерте жылынуына байланысты көпқабатты үйлердің терезелерінен балалардың құлап кету жағдайлары жиілеп барады. Бұл туралы Бас прокуратура мәлімдеді, деп хабарлайды Almaty.tv.

Ведомствоның хабарлауынша, мұндай оқиғалардың басты себебі – ересектердің балаларды қараусыз қалдыруы. Тәжірибе көрсеткендей, қысқа уақыттың өзінде бақылаусыз қалған бала қайғылы жағдайға ұшырауы мүмкін.

Сондай-ақ ашық терезелер мен москиттік торлар ерекше қауіп төндіреді. Мамандар москит торлары баланың салмағын көтере алмайтынын ескертеді.

Қауіпсіздік ережелері: ата-аналар нені білуі керек

Бас прокуратура ата-аналарды қарапайым қауіпсіздік талаптарын сақтауға шақырды. Атап айтқанда:

• кішкентай балаларды қараусыз қалдырмау;
• терезе маңына жиһаз қоймау;
• терезелерге арнайы қорғаныс құралдарын орнату;
• баланың терезеге өздігінен шығуына жол бермеу.

Айта кетейік, қолданыстағы заңнамаға сәйкес жаңа тұрғын үйлерде терезелер арнайы қауіпсіздік құрылғыларымен жабдықталуы тиіс. Сонымен қатар тұрғындардың қауіпсіздігін қамтамасыз ету пәтер иелері бірлестіктері мен басқарушы ұйымдардың да міндетіне кіреді.

Қандай жауапкершілік қарастырылған

Кәмелетке толмағандардың қауіпсіздігін қамтамасыз етпегені үшін ата-аналарға әкімшілік жауапкершілік көзделген. Заңға сәйкес 20 АЕК-ке дейін айыппұл немесе 10 тәулікке дейін қамау жазасы қарастырылған.

Тек соңғы үш айда осы бап бойынша 8 мыңнан астам ата-ана мен заңды өкіл жауапкершілікке тартылған.

Бас прокуратура азаматтарды қырағылық танытып, балалардың өмірі мен денсаулығына қауіп төндіретін жағдайларға жол бермеуге шақырды.

Оқи отырыңыз: Қазақстан Дүниежүзілік банк алаңында жаңа экономикалық бастама көтерді