Елде экологиялық тазалық талаптарын бұзған 177 мыңнан астам жағдай тіркелді

Ішкі істер министрлігі «Таза Қазақстан» республикалық экологиялық бағдарламасын жүзеге асыруды белсенді жалғастырып жатыр. Ведомство тұрмыстық және құрылыс қалдықтарын рұқсат етілмеген жерлерге тастаудың алдын алу, сондай-ақ сұйық қалдықтарды арнайы полигондардан тыс аумақтарға төгу фактілерінің жолын кесу бағытында ауқымды жұмыстар жүргізуде. Бұл туралы ҚР ІІМ мәліметіне сілтеме жасап Almaty.tv хабарлайды.

Ресми деректерге сүйенсек, жыл басынан бері бес айдың ішінде ел аумағында 248 заңсыз қоқыс үйіндісі әшкереленген. Сондай-ақ қоғамдық орындарды ластау және абаттандыру қағидаларын бұзумен байланысты 177 мыңнан астам әкімшілік құқық бұзушылық тіркелді.

Анықталған заңбұзушылықтар бойынша атқарылған жұмыстар:

• 58 материал тиісті шаралар қабылдау үшін экология департаменттеріне, жергілікті атқарушы және басқа да уәкілетті мемлекеттік органдарға жолданды.
• Жергілікті атқарушы органдарға заңбұзушылықтарды жою туралы 172 ұсыным енгізілді.
• Осы ұсынымдарды қарау нәтижесінде бүгінгі таңда 153 заңсыз қоқыс үйіндісі толықтай жойылды.
• Ішкі істер министрлігі барша азаматтарды экологиялық заңнама талаптарын қатаң сақтауға, елді мекендердің тазалығын қолдауға және қоршаған ортаға ұқыптылықпен қарауға шақырады.

Оқи отырыңыз: Туристік маусым: Алматыдағы танымал демалыс орындарында қауіпсіздік шаралары күшейтілді