Интернетте балағат сөз айтқандарға айыппұл енгізілмек

Интернетте балағат сөз айтқандарға 86 мың теңге айыппұл енгізілмек. Бұл туралы Мәжіліс депутаттарының сауалына Премьер-министр Олжас Бектеновтің жауабында айтылған, деп хабарлайды Аlmaty.tv тілшісі.

"Қазақстан Республикасы Әкімшілік құқық бұзушылық туралы кодексінің (бұдан әрі – ӘҚБтК) 434-бабына сәйкес, қоғамдық орындарда балағат сөз айту, жеке тұлғаларға тиісу және айналасындағыларға құрметсіздік білдіретін, қоғамдық тәртіп пен азаматтардың тыныштығын бұзатын өзге де осындай әрекеттер ұсақ бұзақылық саналады және әкімшілік жауаптылыққа әкеп соғады. Мұндай әрекеттер үшін 20 айлық есептік көрсеткіш мөлшерінде айыппұл салу немесе 20-дан 60 сағатқа дейінгі мерзімге қоғамдық жұмыстарға тарту не 5 тәуліктен 15 тәулікке дейін әкімшілік қамаққа алу көзделген", - деді Үкімет басшысы жауабында.

Оның атап өтуінше, қазіргі уақытта «Қазақстан Республикасының Әкімшілік құқық бұзушылық туралы кодексіне онлайн-платформалар және бұқаралық ақпарат құралдары мәселелері бойынша өзгерістер мен толықтырулар енгізу туралы» заңның жобасы әзірленді.

"Заң жобасында ӘҚБтК-нің жоғарыда аталған 434-бабына толықтыру енгізу арқылы онлайн-платформаларда балағат сөздер қолданғаны үшін әкімшілік жауаптылық белгілеу көзделген", - деді Олжас Бектенов.

Оқи отырыңыз: Балқаштың әуежайы елге қайтқан активтердің есебінен жаңарғаны белгілі болды