Қызылшаның алдын алу: әрбір ата-ана білуі тиіс маңызды ережелер қандай

Қызылша — ауа-тамшылары арқылы өте жылдам жұғатын вирустық ауру. Ол жеңіл өтуі мүмкін болғанымен, ауыр салдарға немесе қауіпті асқынуға ұласуы мүмкін болғандықтан, аса қауіпті саналады, деп хабарлайды Almaty.tv.

ҚР ДСМ Санитариялық-эпидемиологиялық бақылау комитеті аурудың алдын алу мен алғашқы белгілері пайда болғанда істелетін әрекеттер туралы маңызды ақпаратты ұсынады.

Қызылша қалай жұғады?

• Жөтел, түшкіру, сөйлеу кезінде ауа тамшылары арқылы оңай таралады.
• Вирус ауада және түрлі беттерде ұзақ уақыт бойы сақталуы мүмкін.

Қызылшаның басты белгілері

Аурудың алғашқы белгілері вируспен байланыста болғаннан кейін 7–14 күн ішінде пайда болады, содан кейін денеде бөртпе шыға бастайды:

• Дене қызуының көтерілуі;
• Жөтел, мұрынның бітелуі;
• Конъюнктивит (көздің қызаруы);
• Теріде бөртпелердің пайда болуы.

Негізгі қорғаныс — Вакцинация (Екпе)

Екі дозалы екпе қызылшадан сенімді әрі ұзақмерзімді қорғаныс береді. Вакцинация — қауіпсіз және өте тиімді:

• 1-доза: 12–15 айлықта жасалады.
• 2-доза: 6 жаста (мектепке дейін) жасалады.

Қызылшаның асқынулары қаншалықты қауіпті?

Қызылша әсіресе кіші жастағы балаларға, жүкті әйелдерге және иммунитеті төмен адамдарға аса қауіпті. Ауру мынадай ауыр асқынуларға әкелуі мүмкін:

• Пневмония (өкпенің қабынуы);
• Отит (құлақтың қабынуы);
• Энцефалит (мидың қабынуы);
• Көру қабілетінің бұзылуы.

Белгілер пайда болса, не істеу керек?

Егер өзіңізден немесе балаңыздан қызылша белгілерін байқасаңыз, келесі сақтық шараларын орындаңыз:

• Үйде болыңыз және дереу дәрігерді үйге шақырыңыз (емханаға өзіңіз бармаңыз).
• Медициналық маска киіңіз.
• Басқа адамдармен байланыстан аулақ болыңыз.
• Ауру туралы дәрігерге хабарласыңыз.

Санитариялық-эпидемиологиялық бақылау комитеті өкілдері екпенің сізді, балаларыңызды және бүкіл қоғамды қызылшадан қорғайтын ең тиімді әдіс екенін еске салады.

Оқи отырыңыз: Алматыда жеке тұлғалардың банкроттығына қатысты өзекті мәселелер талқыланды