Жусан аллергиясынан құтқаратын отандық вакцина: Қазақстанда жаңа препарат сыналуда

Қазақстандық ғалымдар жусан тозаңынан зардап шегетін мыңдаған отандасымыз үшін қуанышты жаңалықпен бөлісті. Қазақ ұлттық аграрлық зерттеу университетінің мамандары жусан аллергиясына қарсы жаңа отандық препараттың клиникалық сынақтарының ІІ кезеңін бастады.

Зертханалық мәліметтерге сүйенсек, жусан тозаңы Қазақстандағы ең негізгі маусымдық аллерген болып табылады. Еліміздегі тозаң аллергиясының шамамен 30 пайызы дәл осы өсімдікке тиесілі. Әсіресе, шілдеден қарашаға дейін созылатын гүлдеу кезеңінде Алматы тұрғындары бұл мәселенің зардабын қатты тартады, — деп хабарлайды Almaty.tv тілшісі Kazinform-ге сілтеме жасап.

Жаңа препараттың артықшылығы неде?

Қазіргі қолданыстағы емдеу әдістері тек симптомдарды уақытша жеңілдетуге бағытталған және бірнеше жылға созылатын ұзақ терапияны қажет етеді. Ал ҚР Денсаулық сақтау министрлігінің ғылыми бағдарламасы аясында жасалған препарат мүлдем басқаша жұмыс істейді:

• Қысқа курс: Терапия небары төрт аптаға созылады — аптасына бір рет, барлығы төрт инъекция жасалады.

• Инновациялық негіз: Препарат жусан тозаңының рекомбинантты ақуыз-аллергені негізінде жасалған.

Сынақ нәтижелері

ҚР Ауыл шаруашылығы министрлігінің хабарлауынша, 30 ерікті қатысқан І кезең сәтті аяқталды. Препараттың қауіпсіздігі мен жақсы көтерілімділігі дәлелденді. Сондай-ақ, тері сынамалары арқылы пациенттердің аллергенге сезімталдығының төмендегені байқалды.

«Қазіргі уақытта 18 бен 65 жас аралығындағы 138 пациент қатысатын ІІ кезеңге рұқсат берілді. Бұл — плацебо-бақыланатын клиникалық сынақ, оған қатысу ұзақтығы 180 күнге дейін созылады. Бұл жоба отандық биофармацевтиканың әлеуетін көрсететін маңызды қадам», — деп атап өтті ведомстводан.

Ғалымдар бұл жобаның сәтті жүзеге асуы Қазақстанның денсаулық сақтау саласындағы өзекті мәселелерді шешуге мүмкіндік беретін заманауи инновациялық препараттар жасаудағы үлкен жеңісі болмақ деп есептейді.

Оқи отырыңыз: Ұлытауда ірі ұрлық схемалары әшкереленді: жанармай мен асыл тастар қолды болған