Қазақстанда қызылша жұқтырғандар саны біршама азайды

ҚР Денсаулық сақтау министрлігі қызылшаға қарсы вакциналау жалғасып жатқанын мәлімдеді, деп хабарлайды Аlmaty.tv тілшісі Kazinform-ға сілтеме жасап.   

— Қазіргі кезде қызылша бойынша елдегі эпидемиологиялық жағдай тұрақтануда. Осы жылдың 7 айында қызылша жұқтырудың 2462 жағдайы тіркелді. Былтырғы осындай кезеңмен салыстырғанда, сырқаттану көрсеткіші 11,4 есеге төмендеді (2024 жылғы 7 айда — 27 760 жағдай). Науқастардың 75 пайызы вакцина егілмеген балалар мен егу мәртебесі белгісіз адамдарға тиесілі. Қызылшаны жұқтырудың басым бөлігі 5 жасқа дейінгі балалар арасында тіркеліп жатыр, — делінген министрліктің Kazinform агенттігіне берген жауабында.

Ведомство ақпаратына қарағанда, эпидемиологиялық жағдайды тұрақтандыру бойынша эпидемияға қарсы іс-шаралар жалғасып жатыр. Оның ішінде профилактикалық екпелердің ұлттық күнтізбесі аясында жоспарлы вакцинациялау (қызылшаға қарсы жоспарлы вакцинациядан 1 жастағы 194 мың бала және 6 жастағы 197 мың бала егілді), бұрын вакцинацияны өткізіп алған 18 жасқа дейінгі балаларға толықтыра вакцинациялау (180 мыңнан астам адам қамтылды) жасалып отыр.

Оқи отырыңыз: Магистратура бойынша мемлекеттік білім гранты иегерлерінің тізімі жарияланды