Көк байрақ, Елтаңба, Әнұран: бүгін – Мемлекеттік рәміздер күні

Жыл сайын 4 маусымда Қазақстанда Мемлекеттік рәміздер күні атап өтіледі. Бұл күн – тәуелсіз Қазақстанның Туы, Елтаңбасы мен Әнұраны бекітілген тарихи дата ретінде ел жадында сақталған ерекше мереке, деп хабарлайды Аlmaty.tv.

1992 жылғы 4 маусымда тәуелсіз Қазақстанның мемлекеттік рәміздері ресми түрде қабылданды. Ал 2007 жылы қабылданған «Қазақстан Республикасының Мемлекеттік рәміздері туралы» Конституциялық заңға сәйкес бұл күн Мемлекеттік рәміздер күні болып белгіленді.

Мемлекеттік рәміздер – егемен еліміздің басты нышандары. Олар мемлекеттің тәуелсіздігін, бірлігі мен тұтастығын білдіріп қана қоймай, халықтың тарихын, мәдениетін және болашаққа деген ұмтылысын бейнелейді.

Көк байрақ – еркіндік пен бірліктің белгісі

Қазақстанның Мемлекеттік туы көгілдір түсті матадан тұрады. Оның ортасында шұғылалы күн мен қыран құс бейнеленсе, сабы жағында ұлттық өрнек орналасқан.

Тудың авторы – Қазақстанның еңбек сіңірген өнер қайраткері Шәкен Ниязбеков.

Көк түс – бейбітшілік пен бірліктің, ал күн – өмір мен молшылықтың белгісі. Қанатын кең жайған қыран құс еркіндікке, биік мақсаттарға ұмтылысты білдіреді.

Бүгінде Қазақстанның көк байрағы халықаралық жарыстарда жеңіске жеткен спортшылардың қолында желбіреп, еліміздің жетістіктерін әлемге танытып келеді. Қазақстан туы Антарктидада, Солтүстік полюс маңында, әлемнің ең биік шыңдарында көтерілді. Тіпті 2015 жылы ғарышкер Айдын Айымбетов оны Халықаралық ғарыш станциясына алып шығып, Жерді бірнеше рет айналып өтті.

Елтаңбадағы терең мағына

Қазақстан Республикасының Мемлекеттік елтаңбасының авторлары – сәулетшілер Жандарбек Мәлібеков пен Шот-Аман Уәлиханов.

Елтаңбаның ортасында қазақ үйінің шаңырағы бейнеленген. Одан күн сәулесіндей тараған уықтар ел бірлігі мен ортақ шаңырақ астындағы татулықты білдіреді. Ал екі жақтағы қанатты пырақтар халқымыздың еркіндікке, даму мен өркендеуге деген ұмтылысын көрсетеді.

Жоғарғы бөлігінде бес жұлдыз орналасса, төменгі жағында «Qazaqstan» жазуы бейнеленген.

Мамандардың айтуынша, Қазақстанның Елтаңбасы көркемдік шешімі мен мазмұндық тереңдігі жағынан әлемдегі ең үздік мемлекеттік рәміздердің бірі саналады.

Әнұран – халық рухының үні

Қазақстанның қазіргі Мемлекеттік гимні 2006 жылы қабылданды. Оның негізіне көпшілікке жақсы таныс «Менің Қазақстаным» әні алынды.

Әнұран елдің тәуелсіздігін, халқымыздың еркіндікке деген сүйіспеншілігін және туған жерге деген мақтанышын паш етеді. Ол халықаралық кездесулерде, ресми іс-шараларда және спорттық жарыстарда орындалады.

Әсіресе қазақстандық спортшылар жеңіс тұғырына көтерілген сәтте Әнұранның шырқалуы әрбір азаматтың жүрегіне мақтаныш сезімін ұялатады.

Мемлекеттік рәміздерді құрметтеу – әр азаматтың міндеті

Президент Қасым-Жомарт Тоқаев мемлекеттік рәміздер ел егемендігінің айғағы екенін бірнеше рет атап өтті. Мемлекет басшысының айтуынша, Ту, Елтаңба және Әнұран – Қазақстанның тәуелсіздігін әлемге танытатын қасиетті нышандар.

Соңғы жылдары мемлекеттік рәміздерді пайдалану тәртібін жетілдіру бойынша бірқатар бастама көтерілді. Соған сәйкес азаматтарға Мемлекеттік туды тұрғын үйлерге, балкондарға және түрлі қоғамдық шараларда ілуге мүмкіндік берілуде. Алайда ұлттық рәміздерді таза әрі бүтін күйде ұстап, оларға құрметпен қарау міндетті талап болып қала береді.

Заңнамаға сәйкес мемлекеттік рәміздерді қорлау немесе оларға құрметсіздік таныту жауапкершілікке әкеледі.

Мемлекеттік рәміздер – ұлт мақтанышы

Бүгінде Ту, Елтаңба және Әнұран тек ресми нышандар ғана емес. Олар – халқымыздың ортақ тарихын, тәуелсіздігін және болашаққа деген сенімін білдіретін құндылықтар.

Сондықтан 4 маусым – мемлекеттік рәміздерді ұлықтап, олардың мәні мен маңызын тағы бір мәрте еске түсіретін ерекше күн. Тәуелсіз елдің рәміздері – ұлттың рухын көтеретін, елді бір мақсатқа жұмылдыратын қасиетті белгілер.

Оқи отырыңыз: Мемлекет басшысы Қырғыз Республикасының президентіне құттықтау жеделхатын жолдады