Көктемде иммунитетті қалай күшейтуге болады - мамандар кеңесі

Көктем айларында ағза әлсіреп, түрлі ауруларға қарсы тұру қабілеті төмендеуі мүмкін. Сондықтан бұл кезеңде иммунитетті күшейтуге ерекше көңіл бөлген жөн,  деп хабарлайды Almaty.tv.

Мамандардың айтуынша, денсаулықты сақтау үшін қарапайым, бірақ тиімді әдеттерді ұстану маңызды.

Иммунитеттің төмендегенін қалай білуге болады?

Дәрігерлер иммунитеттің жай-күйін арнайы талдауларсыз-ақ шамамен бағалауға болатынын айтады.

Егер тері таза, қабыну мен бөртпе жоқ болса, ауыз қуысының жағдайы қалыпты болса, ағзаның қорғаныс жүйесі жақсы жұмыс істеп тұрғанын білдіреді.

Ал керісінше, тері аурулары мен жиі қабынатын инфекциялар ағзада созылмалы сырқаттардың барын көрсетуі мүмкін.

Иммунитетті күшейтудің негізгі жолдары

Мамандар күнделікті өмір салты иммунитетке тікелей әсер ететінін атап өтеді. Ұзақ уақыт компьютер алдында отыру, ұйқының қанбауы ағзаның қорғаныс қабілетін әлсіретеді.

Әсіресе сапалы ұйқы маңызды, себебі дәл осы кезде ағза ауру қоздырғыштармен күресетін жасушаларды қалыптастырады.

Тамақтану да көп рөл атқарады. Рационда көкөніс, жеміс-жидек пен көк шөп түрлері жеткілікті болуы керек.

Сонымен қатар таза суды жеткілікті мөлшерде ішу ұсынылады. Ал қант пен жеңіл көмірсуларды шектеген жөн.

Майлы, қуырылған тағамдар, темекі мен алкоголь сияқты зиянды әдеттер, сондай-ақ антибиотиктерді бақылаусыз қабылдау ағзаны әлсіретеді. Сондықтан мұндай зиянды әдеттерден  барынша аулақ болған дұрыс.

Қорыта айтқанда, иммунитетті нығайту үшін дұрыс тамақтану, жеткілікті ұйқы және салауатты өмір салты басты рөл атқарады.

Дереккөз: a24.press

Оқи отырыңыз: Көктемгі аллергиядан қорғану жолдары қандай