Мақсат Жақау: «Жаңартылған Конституция – Қазақстанның қазіргі замандағы сын-қатерге берген жауабы»

Конституцияның жаңартылған нұсқасы Қазақстанның мемлекеттік басқару жүйесін қазіргі заман талабына бейімдеп, жаһандық өзгеріс кезінде елдің тұрақты дамуын қамтамасыз етуге деген ұмтылысы. Бұл туралы Алматы қаласының Өңірлік коммуникациялар қызметіне берген сұхбатында Абай атындағы Қазақ ұлттық педагогикалық университетінің әлеуметтік даму жөніндегі проректоры, саясаттанушы Мақсат Жақау мәлімдеді, - деп хабарлайды Almaty.tv тілшісі.

Сарапшының айтуынша, конституциялық реформа елдегі саяси жаңғырудың заңды жалғасы әрі мемлекеттің алдындағы жаңа сын-қатерге берген жауап.

«Жаңартылған конституцияның басты мазмұны – өзгермелі әлем жағдайында Қазақстанның одан әрі даму бағытын айқындауында. Конституциялық өзгерістер қоғамдық үдеріс пен азаматтардың сұранысын жан-жақты саралаудың арқасында қабылданды», – деді саясаттанушы.

Оның пікірінше, жаңартылған негізгі заңда адам құқығы мен бостандығын қорғауға ерекше назар аударылған. Азаматтың мүддесі жүргізіліп жатқан реформадағы басты басымдықтың біріне айналды.

Сонымен қатар конституция қоғам дамуының қазіргі үрдістерін, оның ішінде мемлекеттік басқару жүйесін цифрландыру мен цифрлық экономикаға көшуді де ескереді. Бұл мемлекеттік басқаруды одан әрі жаңғыртып, жаңа технологияларды енгізуге қажетті құқықтық негіз қалыптастырады.

Сарапшы конституция елдің бүкіл құқықтық жүйесінің берік іргетасы болып қала беретінін атап өтті. Мемлекеттік институттардың қызметі осы құжаттың қағидаттарына негізделеді, заңдар соған сәйкес қабылданып, мемлекеттің тұрақты дамуы қамтамасыз етіледі.

«Конституция – жай ғана құқықтық нормалардың жиынтығы емес, ол – мемлекеттіліктің негізі. Ол мемлекеттік басқарудың негізгі қағидатын айқындайды, елдің сабақтастықпен дамуын қамтамасыз етіп, қазіргі ішкі әрі сыртқы сын-қатерге тиімді жауап беруге мүмкіндік береді», – деп түйіндеді.

Оқи отырыңыз: Жастар жаңартылған конституцияның күшіне енуін қолдайды