Қазақстанның жаңа рекорды: Артем Антропов Талдықорғанда ел чемпионатының алтынын жеңіп алды

Талдықорған қаласында ауыр атлетикадан Қазақстан Республикасының чемпионаты жалғасып жатыр. Жарыстың алтыншы күнінде 110 келіге дейінгі салмақ дәрежесіндегі тартыс өте тартысты өтіп, медальдар үшін күрес соңғы сәттерге дейін созылды, деп хабарлайды Аlmaty.tv.

Бұл салмақта Қарағанды облысының намысын қорғайтын атақты штангист, әлем чемпионы Артем Антропов сенімді жеңіске жетті. Спортшы бірінші орынды иеленіп қана қоймай, серпе көтеруде және қоссайыс қорытындысы бойынша Қазақстанның жаңа рекордтарын орнатты. Оның жалпы көрсеткіші 405 келіні құрады.

Антропов қарсыластарынан үлкен басымдықпен алға шыққан тұста, оның артында қалған жүлделі орындар үшін тартыс өте шиеленісті болды. Қола жүлдегер мен 4-орынға тұрақтаған спортшының арасын бәсекеде небәрі 1 келі ғана бөлді.

Жарыстың қорытынды нәтижелері:

• Артем Антропов (Қарағанды облысы) — 405 келі (жұлқа көтеруде 175 + серпе көтеруде 230)
• Матвей Макрушин (Жетісу облысы) — 350 келі (155 + 195)
• Темірлан Оқашев (ШҚО) — 347 келі (150 + 197)
• 4-орын: Данил Бетехтин (Жетісу облысы) — 346 келі (151 + 195)

Жеңімпаз өз өнерін сын көзбен бағалап, бұдан да жоғары нәтиже көрсете алатынын жеткізді.

«Бүгінгі шығуымды “4-” деген бағамен бағалаймын. Себебі бұдан да жақсы нәтиже көрсете аламын. Бүгін мен соны дәлелдедім. 110 келіге дейінгі салмақ дәрежесіне біртіндеп бейімделіп келемін. Ислам ойындарымен салыстырғанда ілгерілеушілік бар. Азия ойындарына дайындықты күшейтеміз», — деді Артем Антропов.

Атлеттердің қарқыны жылдан-жылға артып келе жатқанын байқауға болады. Мәселен, 2025 жылғы Қазақстан чемпионатының нәтижелерімен салыстырсақ, ол кезде де үздік үштік мынадай болған еді: Артем Антропов 380 келімен (160+220) алтын алса, Матвей Макрушин 336 келімен (150+186) күміс, ал Темірлан Оқашев 327 келімен (140+187) қола жүлдені місе тұтқан. Биылғы көрсеткіштер отандық ауыр атлеттердің шеберлігі айтарлықтай өскенін айқын көрсетеді.

Оқи отырыңыз: Алматыда спорттық құзға өрмелеуден Қазақстан чемпионаты аяқталды