Желідегі қауіп: қаскөйлер балалардың сеніміне қалай кіреді

Ішкі істер министрлігі ата-аналар мен кәмелетке толмағандарға онлайн-груминг қаупі туралы ескертеді. Бұл – қылмыскерлердің интернет арқылы балалармен сенімді қарым-қатынас орнату үшін пайдаланатын қауіпті схемасы, - деп хабарлайды Almaty.tv тілшісі Polisia.kz сайтына сілтеме жасап.

Әдетте, мұның бәрі әлеуметтік желілердегі, мессенджерлердегі, онлайн-ойындардағы немесе танымал интернет-платформалардағы қарапайым таныстықтан басталады. Қаскей кәмелетке толмаған баланың сеніміне кіру үшін өзін жасөспірім ретінде таныстыруы мүмкін. Алғашқы кезеңдерде қарым-қатынас өте достық әрі зиянсыз болып көрінеді. Одан кейін зиянкес біртіндеп баланың «жақын досына» айналуға тырысады: күн сайын сөйлесіп, ерекше назар аударады, оның жеке өміріне, уайымдары мен мәселелеріне қызығушылық танытады. Уақыт өте келе ол жеке сипаттағы сұрақтар қоя бастайды: күн тәртібін, тұрғылықты жерін, араласатын ортасын және басқа да ақпараттарды анықтайды.

Келесі кезең – фотосуреттер мен видеожазбалар жіберуді сұрау немесе бұдан да жақын тақырыптарда сөйлесуге көшу. Бұл ретте заң бұзушы баланы мұндай әңгімелер қалыпты жағдай екеніне сендіруі мүмкін, сондай-ақ бұл хат-хабарлар туралы ешкімге айтпауды өтінеді немесе психологиялық қысым көрсетеді.

ІІМ еске салады: онлайн-грумер – бұл баланың сеніміне кіріп, кейіннен оған зиян келтіру үшін интернет арқылы кәмелетке толмағандармен әдейі байланысқа түсетін ересек адам.

Онлайн-грумингтен қалай қорғануға болады:

• интернетте бейтаныс адамдармен байланысқа түспеу;
• жеке мәліметтерді, тұрғылықты мекенжайды, телефон нөмірін, оқитын жерін және басқа да құпия ақпаратты айтпау;
• бейтаныс қолданушыларға фотосуреттер мен видеожазбаларды жібермеу;
• егер сұхбаттасушы интимдік сипаттағы сұрақтар қойса немесе хат-хабарды құпия сақтауды сұраса, сөйлесуді дереу тоқтату;
• күдікті аккаунттарды бұғаттау (блокқа қою);желідегі кез келген күдікті байланыстар туралы ата-анаға дереу айту.

ІІМ ата-аналарды балалармен интернеттегі қауіпсіз мінез-құлық ережелерін жүйелі түрде талқылауға және олардың онлайн-белсенділігіндегі өзгерістерге назар аударуға шақырады. Баланың цифрлық ортадағы қауіпсіздігі шынайы өмірдегідей қырағылықты талап етеді.

Оқи отырыңыз: Киевте қазақстандықтарды есірткі бизнесіне тартқан call-орталықтар желісі жойылды