Рамазан: ораза қабыл болу үшін не істеу керек

19 ақпанда Қасиетті Рамазан басталады. Бар мұсылман ниеттеніп, ауыз бекітеді. Осы тұста "ораза тек тамақтан тыйылу ма?" деген сұрақ туындайды. 

Almaty.tv тілшісі ораза қабыл болу үшін қандай жағдайды ескеру керек екенін саралап көрді.

Ораза – уақытша ашығу емес, рухани жаңғыру кезеңі. Көп жағдайда ораза ас-судан тыйылумен шектеледі. Шындығында оның мәні әлдеқайда терең. Ораза – жүректі тазартып, ниетті дұрыстап, ойды реттеу.

Аштық адамды әлсіретпейді, керісінше ол сергек жүреді.

• Байқап көріңіз, нәпсінің үні бәсеңдегенде, жүректің үні естіледі.

Ораза сабырды қалыптастырады. Аштық пен шөлге шыдай білген адам ашуланбауды, артық сөз айтпауды үйренеді.

Ашуланған жағдайда не әлдекіммен сөзге келіп қалсаңыз «мен оразамын» деп үндемей қалу – әлсіздік емес, рухани күштің белгісі. 

• Есте сақтаңыз, бұл – мінезді тәрбиелеудің ең көркем жолы.

Ораза мейірімді болуды үйретеді. Аштықтың дәмін сезген жан жоқшылықтың қадірін түсінеді. Қолында барына шүкір етіп, өзгеге жанашыр болуға ұмтылады. Осы тұрғыдан алғанда ораза – жеке адамды ғана емес, қоғамды да өзгерте алады.

• Айналаңызға зер салыңыз, бір ай бойы адамдар мейірімді болғанын байқайсыз.

Оразаның басты талаптарының бірі – ниет.  Өзге құлшылық түрлерін бақылауға болады, намазды қалай оқиды, садақаны кімге береді, көре аласыз.

Ал оразаны адамның шын ұстағанын Алладан басқа ешкім білмейді. Демек бұл айда адамның шынайы ниеті сыналады.

• Айнаға қарағандай, жан дүниеңізге үңіліңіз, өзіңізді алдай алмайсыз.

Қорыта келгенде Рамазан аяқталғанда ой тазарып, ашуланбай, сабыр ете алсақ, сөздік қор жаңарып, жүрегіміз жұмсарса, ораза жемісін бергені.

• Ай соңында бағалаңыз, егер тек аш қалып, мінез өзгермесе, оразаның рухани мәніне жете алмағанымыз.

Оразаның қасиеті – аштықта емес, адамды тәрбиелеуінде.

ҚМДБ мәліметіне сәйкес, Қадір түні 16 наурыздан 17 наурызға қараған түнге сәйкес келеді. Ораза айт мейрамы 20 наурызда, Құрбан айт мейрамы 27–29 мамыр аралығында атап өтілетінін еске салайық.

Оқи отырыңыз: Рамазанға санаулы сағат қалды: cауап жасау үшін бай болу міндетті емес